واشنگٹن (رائٹرز، خبر ایجنسیاں) امریکا میں فضائی ٹریفک کا بحران تیسرے روز بھی برقرار رہا، جہاں اتوار 15 نومبر کو 1500 سے زائد پروازیں منسوخ اور ہزاروں تاخیر کا شکار ہوئیں۔ جمعے کو وفاقی ادارہ برائے ہوا بازی کے نظام میں تکنیکی خرابی کے باعث ملک بھر میں پروازوں کی روانگی روک دی گئی تھی، جس کے اثرات تاحال فضائی آپریشنز پر مرتب ہو رہے ہیں۔
رائٹرز کے مطابق اتوار کو ابتدائی اعداد و شمار میں 1600 سے زائد پروازیں منسوخ اور تقریباً 3600 تاخیر کا شکار ہوئیں، جبکہ بعد کے اعداد و شمار میں منسوخ پروازوں کی تعداد 2200 سے تجاوز کرگئی اور تاخیر کا شکار پروازیں 18 ہزار سے زیادہ ہوگئیں۔
امریکی حکام کے مطابق 13 نومبر کو فضائی ٹریفک کنٹرول کے مواصلاتی نظام میں خرابی پیدا ہوئی تھی، جس کے باعث احتیاطی طور پر ملک گیر سطح پر پروازیں روکنے کا فیصلہ کیا گیا۔ وفاقی ادارہ برائے ہوا بازی کے مطابق اس خرابی سے 22 میں سے 17 فضائی ٹریفک کنٹرول مراکز متاثر ہوئے تھے۔
امریکی وزیر ٹرانسپورٹ شان ڈفی نے امید ظاہر کی ہے کہ فضائی آپریشنز پیر تک بڑی حد تک معمول پر آجائیں گے۔ حکام نے سائبر حملے کے شواہد نہ ملنے کی بھی تصدیق کی ہے، تاہم نظام میں خرابی کی وجوہات کی تحقیقات جاری ہیں۔
اس بحران کے باعث ہزاروں مسافر ہوائی اڈوں پر پھنس گئے، جبکہ فضائی کمپنیوں کو پروازوں کے شیڈول اور عملے کی دستیابی بحال کرنے میں مشکلات کا سامنا ہے۔

