مکہ مکرمہ(سعودی میڈیا، سعودی الاخباریہ)مسجد الحرام کے مؤذن شیخ ابراہیم بن عادل مدنی آج 21 ستمبر کو انتقال کر گئے، ان کی عمر 51 برس تھی۔ وہ مسجد الحرام کی مکبریہ کے ارکان میں شامل تھے۔
شیخ ابراہیم مدنی مسجد الحرام کے 24 بنیادی مؤذنوں میں شامل تھے، جن میں سے 6 مؤذن روزانہ پانچوں نمازوں اور فجر کی پہلی اذان کی ذمہ داری انجام دیتے ہیں۔مرحوم مؤذن فجر کی اذان، عید کی تکبیرات اور امام کے پیچھے مکبریہ سے تکبیرات پہنچانے کے حوالے سے معروف تھے۔
شیخ ابراہیم مدنی کی وفات کی خبر سعودی سرکاری نشریاتی ادارے الاخباریہ نے بھی نشر کی، جس کے بعد حرمین شریفین سے وابستہ افراد اور اذان سے دلچسپی رکھنے والوں نے ان کی اذان اور تکبیرات کی یادگار ریکارڈنگز سوشل میڈیا پر شیئر کیں۔
سعودی میڈیا کے مطابق شیخ ابراہیم مدنی نے گزشتہ عرصے میں مسجد الحرام میں اذان اور تکبیرات کی ادائیگی کے ذریعے طویل عرصے تک خدمت انجام دی۔ ان کی آواز بالخصوص فجر کی اذان کے حوالے سے جانی جاتی تھی۔
ذرائع کے مطابق مرحوم کی نماز جنازہ آج نماز عصر کے بعد مسجد الحرام میں ادا کی جائے گی اور انہیں مکہ مکرمہ کے قبرستان جنت المعلیٰ میں سپرد خاک کیا جائے گا۔
