المیرات (خبر ایجنسیاں) انڈر 19 ایشیا کپ کے سنسنی خیز فائنل میں بھارت نے پاکستان کو آخری گیند پر ایک وکٹ سے شکست دے کر ٹائٹل اپنے نام کرلیا۔ بھارت نے پاکستان کا 338 رنز کا ہدف 9 وکٹوں کے نقصان پر پورا کرلیا۔
عمان کے شہر المیرات میں کھیلے گئے فائنل میں پاکستان نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 337 رنز بنائے۔ عثمان خان نے شاندار سنچری اسکور کرتے ہوئے 107 رنز بنائے، عبدالقادر نے 80 جبکہ کپتان فرحان یوسف نے 63 رنز کی اننگز کھیلی۔ بھارت کی جانب سے کاویہ پٹیل نے 4 اور چگورپتی وینکٹا نے 3 وکٹیں حاصل کیں۔
جواب میں بھارتی ٹیم نے 338 رنز کا ہدف آخری اوور کی آخری گیند پر حاصل کیا۔ ایک موقع پر بھارت کی 8 وکٹیں 252 رنز پر گر چکی تھیں اور اسے شکست کا سامنا دکھائی دے رہا تھا، تاہم موہت اولوا اور منال چوہان نے نویں وکٹ کی شراکت میں 57 رنز بنا کر میچ کا نقشہ بدل دیا۔
منال چوہان نے 47 رنز بنائے جبکہ موہت اولوا نے صرف 26 گیندوں پر ناقابلِ شکست 49 رنز کی دھواں دار اننگز کھیلی۔ انہوں نے آخری گیند پر چوکا لگا کر بھارت کو فتح دلائی۔ وینکٹا 11 رنز کے ساتھ ناٹ آؤٹ رہے۔
بھارتی ٹیم نے اس کامیابی کے ساتھ انڈر 19 ایشیا کپ کا اپنا ریکارڈ نویں مرتبہ ٹائٹل جیت لیا، جبکہ پاکستان اعزاز کا دفاع کرنے میں ناکام رہا۔پاکستان کی جانب سے عثمان خان کی 107 رنز کی اننگز اور عبدالقادر کی جارحانہ بیٹنگ بھی ٹیم کو فتح نہ دلا سکی۔
