مسی ساگا (بابا عرفان ملک سے) تین بار میئر رہنے والی سابق میئر مسی ساگا بونی کرومبی نے اپنے انتخابی دفتر کا افتتاح کرتے ہوئے چوتھی بار میئر منتخب ہونے کی صورت میں شہر کو زیادہ قابلِ برداشت بنانے، سرکاری اخراجات میں کمی، ٹیکسوں کو مہنگائی کی شرح تک محدود رکھنے، پولیس اور صفِ اول کی خدمات انجام دینے والے کارکنوں کی حمایت اور مسی ساگا کو ٹریفک کے مسائل سے نکال کر دوبارہ متحرک کرنے کا عزم ظاہر کیا ہے۔
انتخابی مہم کے آغاز کی تقریب سے خطاب کرتے ہوئے بونی کرومبی نے کہا کہ وہ مسی ساگا کیلئے حکومت کی کسی بھی سطح پر ہمیشہ آواز اٹھاتی رہی ہیں اور آئندہ بھی شہر کیلئے کام کرتی رہیں گی۔ انہوں نے کہا کہ موجودہ حالات کا جائزہ لینے کے بعد انہیں محسوس ہوا کہ مسی ساگا کو مستقبل کی تعمیر کیلئے ایک ایسی تجربہ کار قیادت کی ضرورت ہے جس پر شہری اعتماد کرسکیں۔
بونی کرومبی نے کہا کہ ان کی ترجیح مسی ساگا کو زیادہ قابلِ برداشت شہر بنانا ہے اور وہ سرکاری اخراجات کو قابو میں لانے کیلئے اقدامات کریں گی۔ شہر کے مالی معاملات کا تفصیلی جائزہ لیا جائے گا تاکہ معلوم ہوسکے کہ اخراجات کہاں ہورہے ہیں اور کہاں غیر ضروری اخراجات میں کمی کی جاسکتی ہے۔
انہوں نے کہا کہ وہ سٹی ہال کے مالی معاملات کی جانچ کیلئے آڈیٹر جنرل لائیں گی، حسابات کھولے جائیں گے اور اخراجات کا مکمل جائزہ لے کر انہیں قابو میں لانے کے اقدامات کیے جائیں گے۔
بونی کرومبی نے ٹیکسوں کے حوالے سے کہا کہ ان کے سابق دور میں ٹیکسوں کو مہنگائی کی شرح کے اندر قابلِ برداشت رکھا گیا تھا اور وہ دوبارہ بھی اسی اصول پر عمل کریں گی۔ انہوں نے کہا کہ شہریوں کو ٹیکسوں میں 10 فیصد اضافے کا سامنا نہیں کرنا چاہیے۔ ٹیکس منجمد کرنے کا وعدہ ایک سال کیلئے شاید پورا کیا جاسکتا ہے لیکن طویل مدت میں یہ پالیسی قابلِ عمل نہیں۔
بین الاقوامی میڈیا سے گفتگو کرتے ہوئے بونی کرومبی نے کہا کہ مسی ساگا میں گزشتہ 2 برس کے دوران ٹیکسوں میں 14 فیصد اضافہ ہوا ہے جو پائیدار نہیں، شہری اس قسم کے ٹیکس اضافے کے متحمل نہیں ہوسکتے۔
انہوں نے کہا کہ وہ مضبوط مالی نظم و نسق پر یقین رکھتی ہیں اور سابق میئر ہیزل میک کیلیون کی طرح مالی ذمہ داری کے اصولوں پر عمل کرتے ہوئے شہر کے معاملات کو دوبارہ درست سمت میں لانا چاہتی ہیں۔ ان کا کہنا تھا کہ مسی ساگا کو ایسا مستقبل دینا چاہتی ہیں جس میں شہریوں کیلئے مالی تحفظ، محفوظ ماحول اور انصاف موجود ہو۔
بونی کرومبی نے کہا کہ ان کی اولین ترجیحات میں ٹیکسوں میں ریلیف، مسی ساگا کو زیادہ قابلِ برداشت شہر بنانا، صفِ اول کی سطح پر پولیسنگ کو مضبوط کرنا اور شہر کو دوبارہ متحرک کرنا شامل ہے۔
انہوں نے موجودہ بلدیاتی انتظامیہ پر تنقید کرتے ہوئے کہا کہ مسی ساگا ایک ایسے شہر میں تبدیل ہوگیا ہے جو آگے بڑھنا رک گیا ہے، شہر میں ہر طرف ٹریفک کا دباؤ اور گاڑیوں کا رش ہے جبکہ ہلکی ریل کے منصوبے کی مناسب نگرانی بھی نہیں کی جارہی۔
انہوں نے کہا کہ ہلکی ریل کا منصوبہ پہلے ہی 2 سال تاخیر کا شکار ہے اور اب اس کے مزید 2 سال بعد شروع ہونے کی بات کی جارہی ہے، اس صورتحال کا کوئی بہتر حل ہونا چاہیے۔ مسی ساگا جیسے شہر کا اس طرح تعطل کا شکار ہونا قابلِ قبول نہیں۔
بونی کرومبی نے پیل ریجنل پولیس کے ساتھ تعاون کو بھی اہم قرار دیتے ہوئے کہا کہ مقامی پولیس کی بھرپور حمایت ضروری ہے اور پولیس بورڈ کے ساتھ بھی اس معاملے پر بات کی گئی ہے۔ جرائم میں کمی، شہریوں کے تحفظ اور مقامی پولیس کی معاونت کو مزید مضبوط کرنا ان کی ترجیحات میں شامل ہے۔
انہوں نے کہا کہ پولیس اور صفِ اول پر خدمات انجام دینے والے تمام کارکنوں کی حمایت ضروری ہے، جبکہ شہر کے فائر فائٹرز سمیت شہریوں کو بنیادی خدمات فراہم کرنے والے کارکنوں کو مکمل تعاون ملنا چاہیے۔
بونی کرومبی نے بزرگ شہریوں کے مسائل پر بھی بات کرتے ہوئے کہا کہ ایسے بزرگ جنہیں اپنے گھروں سے محروم ہونے کا خطرہ ہے، انہیں مدد اور مالی ریلیف فراہم کیا جانا چاہیے تاکہ وہ مسی ساگا چھوڑنے پر مجبور نہ ہوں۔ ان کا کہنا تھا کہ وہ چاہتے ہیں کہ بزرگ اپنے عزیزوں، خاندان اور پوتے پوتیوں کے قریب مسی ساگا میں ہی ریٹائرمنٹ کی زندگی گزاریں۔
انہوں نے پولیس کیلئے مالی وسائل کے طریقہ کار پر نظرثانی کی ضرورت پر زور دیتے ہوئے کہا کہ پولیس کی مالی معاونت کا موجودہ طریقہ کار تبدیل نہیں ہوا، اس لیے اس معاملے پر بھی سنجیدگی سے غور کرنا ہوگا۔
بونی کرومبی نے کہا کہ وہ مسی ساگا سے محبت کرتی ہیں اور یہی وہ شہر ہے جسے انہوں نے اپنے بچوں کی پرورش اور اپنی زندگی گزارنے کیلئے منتخب کیا۔ وہ نجی شعبے میں اپنی مرضی کی کوئی بھی ملازمت اختیار کرسکتی تھیں لیکن انہوں نے مسی ساگا میں رہنے، شہریوں کی خدمت کرنے اور شہر کیلئے کام کرنے کو ترجیح دی۔
انہوں نے سابق میئر ہیزل میک کیلیون کا ذکر کرتے ہوئے کہا کہ انہوں نے ان کی قیادت میں مالی ذمہ داری، مکمل تیاری اور فیصلوں سے قبل تمام پہلوؤں کا جائزہ لینے کی اہمیت سیکھی۔ بونی کرومبی نے کہا کہ ہیزل میک کیلیون نے انہیں مسی ساگا کے اگلے باب کو تحریر کرنے کا اعتماد دیا تھا اور وہ اسی بنیاد کو برقرار رکھتے ہوئے شہر کو مزید بہتر بنانا چاہتی ہیں۔
انہوں نے کہا کہ مسی ساگا کے شہریوں کی ساخت وقت کے ساتھ تبدیل ہوئی ہے اور ان کی ذمہ داری تھی کہ ہر ثقافت اور ہر مذہب سے تعلق رکھنے والے شہری خود کو شہر میں خوش آمدید، شامل اور قابلِ قدر محسوس کریں۔ یہی وجہ ہے کہ مختلف پس منظر رکھنے والے لوگ مسی ساگا میں ترقی کرتے رہے ہیں۔
بونی کرومبی نے کہا کہ وہ مسی ساگا کے شہریوں کا اعتماد دوبارہ حاصل کرنے کیلئے ایک ایک ملاقات کے ذریعے کام کریں گی۔ انتخابی مہم کے دوران گھروں میں ہونے والی تقریبات، ضیافتوں، افتتاحی تقریبات اور دیگر عوامی سرگرمیوں میں شہریوں سے براہِ راست رابطہ کیا جائے گا۔
انہوں نے کہا کہ گزشتہ روز ان کی 9 اور آج 8 تقریبات تھیں، تاہم وہ اس سرگرمی کو پسند کرتی ہیں اور ان کے اندر اس کیلئے بھرپور توانائی موجود ہے۔ ان کا کہنا تھا کہ انہیں شہریوں کا اعتماد دوبارہ حاصل کرنا ہے اور انتخابی مہم کا آغاز حوصلہ افزا رہا ہے۔
تقریب سے قومی پارلیمانی جماعت کے چیئرمین اور رکن پارلیمنٹ جیمز ملونی نے خطاب کرتے ہوئے کہا کہ بونی کرومبی دوبارہ مسی ساگا کی میئر بننے کی صلاحیت رکھتی ہیں۔ انہوں نے کہا کہ وہ بونی کرومبی کے ذاتی دوست ہیں اور دونوں نے ایک ہی ہائی اسکول میں تعلیم حاصل کی۔
جیمز ملونی نے کہا کہ انہوں نے بونی کرومبی کو خاندان، برادری اور عملی زندگی کے مختلف شعبوں میں کام کرتے دیکھا ہے اور وہ جس جذبے اور محنت کے ساتھ کام کرتی ہیں، وہ قابلِ تعریف ہے۔ انہوں نے کہا کہ بونی کرومبی مشکل ترین سیاسی حریفوں کا مقابلہ کرنے کے چیلنج کو ہمیشہ قبول کرتی ہیں، وہ ایک مضبوط رہنما ہیں اور ماضی میں میئر کی حیثیت سے خدمات انجام دے چکی ہیں۔
انہوں نے کہا کہ موجودہ سیاسی حالات ایسے ہیں جن کی چند سال قبل کسی کینیڈین نے پیش گوئی نہیں کی تھی، اس لیے حکومت کی ہر سطح پر مضبوط قیادت ضروری ہے۔ جیمز ملونی نے وزیر اعظم مارک کارنی کے ساتھ کام کرنے پر فخر کا اظہار کرتے ہوئے کہا کہ وہ ملک کو درست سمت میں لے جارہے ہیں۔
انہوں نے کہا کہ مسی ساگا کی آئندہ 4 سال کیلئے قیادت کیلئے بونی کرومبی سے بہتر کوئی شخص نہیں اور وہ پُرامید ہیں کہ اکتوبر میں بونی کرومبی دوبارہ میئر منتخب ہوں گی۔
تقریب سے بونی کرومبی کے انتخابی معاون مبشر اکرم نے بھی خطاب کیا۔ انہوں نے کہا کہ انتخابی دفتر کا باضابطہ افتتاح اور انتخابی مہم کا آغاز کیا جارہا ہے اور وہ اس انتخاب میں بونی کرومبی کے ساتھ کھڑے ہونے پر فخر محسوس کرتے ہیں۔
مبشر اکرم نے کہا کہ بونی کرومبی مسی ساگا میں دوبارہ جذبے، توانائی اور ترقی کے عزم کو زندہ کرنا چاہتی ہیں۔ انہوں نے بتایا کہ وہ گزشتہ 14 برس سے مسی ساگا میں سیدۃ خدیجہ مرکز کے طالب علم اور فعال نوجوان رکن ہیں۔
انہوں نے اپنے استاد اور امام ڈاکٹر حامد سلیمی کی کمیونٹی اور بین المذاہب ہم آہنگی کیلئے خدمات کو بھی سراہا اور کہا کہ انہوں نے نئے مسی ساگا اسپتال کی حمایت اور رمضان کے دوران اشیائے خورونوش جمع کرنے کی مہم کے ذریعے مسی ساگا فوڈ بینک کیلئے عطیات جمع کرنے سمیت مختلف سماجی اقدامات میں اہم کردار ادا کیا ہے۔
تقریب کے اختتام پر بونی کرومبی کے حامیوں نے ان کے حق میں نعرے لگائے، جبکہ بونی کرومبی نے شہریوں سے انتخابی مہم کیلئے رجسٹریشن کرانے، اپنے گھروں پر انتخابی مہم کا نشان لگانے اور ووٹروں سے رابطے میں معاونت کرنے کی اپیل کی۔
