مسی ساگا(نمائندہ خصوصی)کینیڈا ڈے کے موقع پر رکن پارلیمنٹ اقرا خالد نے کینیڈا ڈے ٹوگیدر فیسٹیول میں شرکت کی، جہاں ان کے حلقہ انتخاب کے دفتر کی جانب سے معلوماتی اسٹال قائم کیا گیا۔ اس موقع پر ہزاروں شہریوں نے فیسٹیول میں شرکت کی اور اقرا خالد و ان کی ٹیم سے ملاقات کی۔
فیسٹیول کے دوران خاندانوں، بزرگوں، نوجوانوں اور دیگر شہریوں نے معلوماتی اسٹال کا دورہ کیا، وفاقی حکومتی پروگراموں اور خدمات سے متعلق معلومات حاصل کیں، کینیڈا ڈے کی یادگاری اشیا وصول کیں اور اپنے مسائل، تجاویز اور آرا بھی رکن پارلیمنٹ اور ان کی ٹیم کے ساتھ شیئر کیں۔
اقرا خالد نے کہا کہ کینیڈا ڈے صرف ملک کی خوشی منانے کا دن نہیں بلکہ ان لوگوں اور برادریوں کو خراجِ تحسین پیش کرنے کا موقع بھی ہے جو کینیڈا کو ایک منفرد ملک بناتے ہیں۔ انہوں نے کہا کہ مختلف پس منظر رکھنے والے شہریوں سے ملاقات، ان کی باتیں سننا اور کینیڈا کی تنوع، باہمی احترام اور مشترکہ اقدار کا جشن منانا خوش آئند تجربہ رہا۔
فیسٹیول میں موسیقی، ثقافتی پروگرام، خاندانی سرگرمیوں، مقامی کاروباری اداروں کے اسٹالز اور مختلف کمیونٹی تنظیموں کی شرکت نے تقریب کو مزید رنگا رنگ بنایا۔ اس موقع پر اقرا خالد نے مقامی تنظیموں، رضاکاروں اور کمیونٹی رہنماؤں سے بھی ملاقات کی اور مضبوط اور جامع معاشرے کی اہمیت پر زور دیا۔
معلوماتی اسٹال پر شہریوں کو وفاقی حکومتی پروگراموں اور خدمات سے آگاہ کیا گیا، جبکہ انہیں اپنے حلقے سے متعلق مسائل اور سرکاری سہولیات کے بارے میں رکن پارلیمنٹ کی ٹیم سے براہِ راست رہنمائی حاصل کرنے کا بھی موقع ملا۔
اقرا خالد نے کہا کہ کینیڈا کی اصل طاقت اس کا تنوع اور وہ برادریاں ہیں جو ایک دوسرے کا ساتھ دیتی ہیں۔ انہوں نے فیسٹیول میں آنے والے تمام شہریوں کا شکریہ ادا کرتے ہوئے کہا کہ ان کی شرکت نے اس تقریب کو یادگار بنا دیا۔انہوں نے فیسٹیول کے کامیاب انعقاد پر منتظمین، رضاکاروں، فنکاروں، معاون اداروں اور تمام شرکا کا بھی شکریہ ادا کیا۔
