جدہ (سعودی سرکاری میڈیا، رائٹرز) سعودی ولی عہد اور وزیر اعظم شہزادہ محمد بن سلمان نے امریکی سینٹرل کمانڈ کے سربراہ ایڈمرل بریڈ کوپر سے جدہ میں ملاقات کی، جس میں سعودی عرب اور امریکا کے دوطرفہ تعلقات اور خطے کی تازہ صورت حال پر تبادلہ خیال کیا گیا۔
سعودی سرکاری میڈیا کے مطابق ملاقات میں علاقائی حالات اور دونوں ملکوں کے باہمی تعلقات کا جائزہ لیا گیا۔
ملاقات ایسے وقت میں ہوئی ہے جب یمنی حوثی تنظیم انصار اللہ کی جانب سے سعودی عرب پر میزائل اور ڈرون حملوں میں اضافہ ہوا ہے۔ حوثیوں نے حالیہ حملے میں خمیس مشیط کے کنگ خالد ایئر بیس کو نشانہ بنانے کا دعویٰ بھی کیا ہے۔
رائٹرز کے مطابق حالیہ دنوں میں شہزادہ محمد بن سلمان نے امریکی صدر ڈونلڈ ٹرمپ سے حوثیوں کے خلاف فوجی مدد طلب کی تھی، تاہم امریکا نے حوثیوں کے خلاف براہِ راست حملوں میں شرکت سے گریز کرتے ہوئے سعودی عرب کو انٹیلی جنس اور اہداف کے تعین میں معاونت فراہم کرنے پر آمادگی ظاہر کی ہے۔
حوثیوں کی جانب سے یمن کے بحیرۂ احمر کے ساحلی علاقوں میں پیش قدمی اور باب المندب کے قریب اہم علاقوں پر قبضے کے دعووں کے بعد سعودی عرب کو خطے میں بڑھتے ہوئے سکیورٹی چیلنجز کا سامنا ہے۔
