ٹورنٹو ( دی ویدر نیٹ ورک، ماحولیاتی ادارہ کینیڈا)کینیڈا کے صوبہ اونٹاریو میں موسمِ گرما کی پہلی شدید گرمی کی لہر اس ہفتے شروع ہونے جا رہی ہے، جس کے باعث یکم جولائی کو یومِ کینیڈا کی تقریبات کے دوران کئی علاقوں میں درجہ حرارت 30 ڈگری سینٹی گریڈ سے تجاوز کر جائے گا، جبکہ نمی کے باعث محسوس ہونے والا درجہ حرارت 40 ڈگری سے بھی زیادہ رہنے کا امکان ہے۔
رپورٹ کے مطابق امریکا کے مشرقی حصے پر قائم طاقتور ہیٹ ڈوم کا اثر گریٹ لیکس کے علاقے تک پہنچ رہا ہے، جس کے باعث پیر سے درجہ حرارت میں مسلسل اضافہ ہوگا اور یہ لہر پورا ہفتہ برقرار رہ سکتی ہے۔
ماہرین کے مطابق پیر اور منگل کو درجہ حرارت 30 ڈگری کے قریب رہے گا، جبکہ منگل کی رات سے بھی خاطر خواہ ٹھنڈک نہیں ملے گی اور رات کا درجہ حرارت 20 سے 25 ڈگری سینٹی گریڈ کے درمیان رہنے کی توقع ہے۔
ٹورنٹو کے وسطی علاقوں میں یومِ کینیڈا پر درجہ حرارت تقریباً 31 ڈگری سینٹی گریڈ رہنے کا امکان ہے، جبکہ پیئرسن بین الاقوامی ہوائی اڈے کے علاقے میں درجہ حرارت 34 ڈگری اور نمی کے باعث محسوس ہونے والا درجہ حرارت 44 ڈگری سینٹی گریڈ تک پہنچ سکتا ہے، جو یومِ کینیڈا کے گرم ترین دنوں میں شمار ہو سکتا ہے۔
ماہرین نے بتایا کہ جھیل اونٹاریو سے آنے والی ٹھنڈی ہوائیں ساحلی علاقوں میں گرمی کی شدت کسی حد تک کم رکھیں گی، تاہم جھیل سے دور اندرونی علاقوں میں درجہ حرارت 30 ڈگری سے اوپر رہنے کا امکان ہے۔
رپورٹ کے مطابق بڑھتی ہوئی گرمی کے باعث فضا میں عدم استحکام پیدا ہوگا، جس سے بدھ اور جمعرات کو گرج چمک کے ساتھ طوفانی بارشوں کا امکان ہے۔ اگرچہ ان طوفانوں کے درست مقامات کا تعین نہیں کیا جا سکا، تاہم بعض مقامات پر یہ شدید نوعیت اختیار کر سکتے ہیں۔
ماہرین نے خبردار کیا ہے کہ شدید گرمی ہر عمر کے افراد کے لیے خطرناک ثابت ہو سکتی ہے، اس لیے پانی کا زیادہ استعمال، وقفے وقفے سے آرام اور ٹھنڈی جگہوں پر رہنے کو یقینی بنایا جائے۔ بزرگ افراد، دائمی بیماریوں میں مبتلا شہری، ائیرکنڈیشننگ سے محروم افراد اور بعض مخصوص ادویات استعمال کرنے والے افراد کو خصوصی احتیاط کی ضرورت ہے، کیونکہ ان میں گرمی برداشت کرنے کی صلاحیت کم ہو سکتی ہے۔
