ٹورنٹو (نمائندہ خصوصی) بنگلہ دیشی نژاد کینیڈین سماجی رہنما تنویر شہنواز کو ٹورنٹو کے اہم وفاقی حلقے بیچز۔ایسٹ یارک سے آئندہ ضمنی انتخاب کے لیے لبرل پارٹی کا امیدوار نامزد کر دیا گیا ہے۔
لبرل پارٹی کی نامزدگی کے لیے ووٹنگ ہفتہ 18 جولائی کو ایسٹ یارک کے گلیڈہل جونیئر پبلک اسکول میں ہوئی، جہاں صبح 11 بجے سے شام 5 بجے تک مجموعی طور پر 873 ارکان نے اپنا حقِ رائے دہی استعمال کیا۔
تنویر شہنواز نے کمیونٹی رہنما سمر نوڈل، سابق اونٹاریو لبرل رکنِ صوبائی اسمبلی آرتھر پوٹس اور وکیل و سابق سرکاری عہدیدار کلیئر سیبورن کو شکست دے کر کامیابی حاصل کی۔ انتخاب درجہ بندی پر مبنی بیلٹ (رینکڈ بیلٹ) کے ذریعے کرایا گیا، جبکہ سابق میئر ٹورنٹو جان ٹوری جونیئر ووٹنگ سے قبل ہی مقابلے سے دستبردار ہوگئے تھے۔ لبرل پارٹی نے امیدواروں کو ملنے والے ووٹوں کی تفصیلات جاری نہیں کیں۔
کامیابی کے بعد تنویر شہنواز نے کہا کہ انہیں اس بات پر فخر ہے کہ پارٹی ارکان نے انہیں بیچز۔ایسٹ یارک سے لبرل امیدوار منتخب کیا۔ انہوں نے وزیراعظم مارک کارنی کا بھی شکریہ ادا کیا کہ انہوں نے ایسا شفاف نامزدگی کا عمل یقینی بنایا جس میں مقامی ارکان کو اپنے امیدوار کے انتخاب کا مکمل اختیار دیا گیا۔
تقریب میں لبرل ارکانِ پارلیمنٹ گیری آننداسنگاری سمیت متعدد پارٹی رہنما اور کارکن شریک ہوئے۔
تنویر شہنواز ایسٹ یارک میں پیدا ہوئے اور وہیں کے علاقے کریسنٹ ٹاؤن میں پرورش پائی، جہاں وہ آج بھی مقیم ہیں۔ وہ کئی برس سے سماجی خدمات اور مقامی مسائل کے حل کے لیے سرگرم کردار ادا کر رہے ہیں۔ ان کی نامزدگی پر ٹورنٹو کی بنگلہ دیشی کمیونٹی نے خوشی کا اظہار کرتے ہوئے انہیں مبارک باد دی ہے۔
سبکدوش ہونے والے رکنِ پارلیمنٹ نیتھنیئل ایرسکن اسمتھ کے مطابق تنویر شہنواز کی عمر ابھی 30 برس سے کم ہے، تاہم وہ گزشتہ تقریباً ایک دہائی سے عوامی خدمت اور پبلک افیئرز کے شعبے سے وابستہ ہیں۔ ان کا کہنا ہے کہ بیچز۔ایسٹ یارک ان کا آبائی حلقہ ہے اور وہ اسی کمیونٹی کی خدمت جاری رکھنا چاہتے ہیں۔
انہوں نے 2016 میں نیتھنیئل ایرسکن اسمتھ کے حلقہ جاتی دفتر میں کام شروع کیا اور 2018 میں حلقہ جاتی دفتر کے منیجر مقرر ہوئے۔ اس دوران انہوں نے وفاقی حکومتی پروگراموں اور عوامی خدمات کے حوالے سے ہزاروں رہائشیوں کی معاونت کی۔
کورونا وبا کے دوران انہوں نے مقامی شہریوں کو حکومتی امدادی پروگراموں تک رسائی دلانے میں اہم کردار ادا کیا۔ بعد ازاں جب نیتھنیئل ایرسکن اسمتھ وفاقی وزیر برائے ہاؤسنگ، انفراسٹرکچر اینڈ کمیونٹیز بنے تو تنویر شہنواز نے ان کے خصوصی مشیر کے طور پر خدمات انجام دیں، جس سے انہیں وفاقی حکومت کے امور اور مقامی ضروریات کا وسیع تجربہ حاصل ہوا۔
وہ ٹیلر میسی اور اوک رج کمیونٹی رسپانس ٹیم کے شریک چیئرمین بھی رہے، جہاں انہوں نے کریسنٹ ٹاؤن، ٹیلر میسی اور اوک رج جیسے کثیرالثقافتی اور تارکین وطن کی بڑی آبادی والے علاقوں میں کمیونٹی کے ساتھ مل کر کام کیا۔
نامزدگی سے قبل نیتھنیئل ایرسکن اسمتھ نے تنویر شہنواز کی بھرپور حمایت کرتے ہوئے انہیں محنتی، باصلاحیت اور عوام کی مؤثر نمائندگی کرنے والا رہنما قرار دیا تھا۔ ایرسکن اسمتھ 2015، 2019، 2021 اور 2025 کے وفاقی انتخابات میں اس حلقے سے کامیاب ہوتے رہے، جبکہ 2025 کے انتخابات میں انہوں نے تقریباً 68 فیصد ووٹ حاصل کیے تھے، جس کے باعث ان کی حمایت کو خاصی اہمیت دی جا رہی ہے۔
نامزدگی اجلاس میں بلی بشپ ٹورنٹو سٹی ایئرپورٹ کی مجوزہ توسیع بھی اہم موضوع رہی۔ تمام امیدواروں نے اس منصوبے کی مخالفت کی، جبکہ تنویر شہنواز نے کہا کہ اگر وہ رکنِ پارلیمنٹ منتخب ہوئے تو اس منصوبے پر مقامی آبادی کے تحفظات کو وفاقی سطح پر بھرپور انداز میں پیش کریں گے۔
انہوں نے اس عزم کا اظہار بھی کیا کہ وہ اپنے سیاسی اور انتظامی تجربے کو بروئے کار لاتے ہوئے بیچز۔ایسٹ یارک کے عوام کی ترجیحات کو ٹورنٹو، اونٹاریو اور قومی سطح پر لبرل کاکس میں مؤثر انداز میں اجاگر کریں گے۔
یہ ضمنی انتخاب نیتھنیئل ایرسکن اسمتھ کے 7 جولائی کو رکنِ پارلیمنٹ کے عہدے سے استعفیٰ دینے کے بعد خالی ہونے والی نشست پر ہوگا۔ ضمنی انتخاب کی تاریخ کا ابھی اعلان نہیں کیا گیا، تاہم کینیڈا کے انتخابی قوانین کے مطابق یہ انتخاب آئندہ چند ماہ کے اندر کرایا جائے گا۔
