ہیلی فیکس (سی بی سی) کینیڈا کے صوبے نووا اسکاٹیا کے ایسٹرن شور میں بے قابو جنگلاتی آگ تیزی سے پھیل کر 1700 ہیکٹر تک جا پہنچی ہے، جبکہ موزلینڈ روڈ کے 22 کلومیٹر طویل علاقے کے لیے لازمی انخلا کا حکم بدستور برقرار ہے۔
صوبائی حکام کے مطابق آگ ہیلی فیکس سے تقریباً 100 کلومیٹر مشرق میں واقع ہے اور جمعرات کی شام تک اس کا رقبہ 300 ہیکٹر تھا، تاہم خشک موسم کے باعث یہ چند گھنٹوں میں پانچ گنا سے زیادہ بڑھ گیا۔
ہیلی فیکس ریجنل میونسپلٹی نے بتایا کہ شام کے وقت فائر فائٹرز اور محکمۂ قدرتی وسائل کا عملہ رات کے لیے واپس چلا گیا، جبکہ نگرانی کے لیے کچھ اہلکار موقع پر موجود رہے۔ امدادی کارروائیاں ہفتہ کی صبح دوبارہ شروع کی جائیں گی۔
حکام کے مطابق شام ساڑھے پانچ بجے تک 21 خاندانوں پر مشتمل 40 افراد کینیڈین ریڈ کراس کے ساتھ رجسٹر ہو چکے تھے، جبکہ دو افراد نے انخلا مرکز میں رات گزارنے کا فیصلہ کیا۔
محکمۂ قدرتی وسائل کے حکام نے بتایا کہ ابھی تک آگ لگنے کی وجہ کا تعین نہیں ہو سکا، تاہم رواں سیزن میں صوبے میں کئی جنگلاتی آگ بجلی گرنے یا انسانی سرگرمیوں کے باعث بھڑکی ہیں۔
حکام نے امید ظاہر کی ہے کہ اتوار کو متوقع بارش آگ پر قابو پانے میں مددگار ثابت ہوگی۔ ماحولیاتی ادارے کے مطابق متاثرہ علاقے میں 15 سے 30 ملی میٹر بارش کا امکان ہے۔
آگ بجھانے کے لیے 25 صوبائی فائر فائٹرز، 31 ہیلی فیکس ریجنل فائر اینڈ ایمرجنسی اہلکار اور رضاکار، سات انسیڈنٹ مینجمنٹ ٹیم کے ارکان، چار واٹر بمبار طیارے، ایک برڈ ڈاگ طیارہ، دو ہیلی کاپٹر اور نیوفاؤنڈ لینڈ سے آنے والے دو مزید واٹر بمبار طیارے کارروائی میں حصہ لے رہے ہیں۔ بھاری مشینری بھی رسائی کے راستے کھولنے اور فائر فائٹرز کی مدد کے لیے استعمال کی جا رہی ہے۔
حکام کے مطابق آگ موزلینڈ روڈ عبور کر گئی تھی، جس کے بعد احتیاطی طور پر نووا اسکاٹیا پاور نے علاقے کی بجلی منقطع کر دی۔ابتدائی اندازوں کے مطابق انخلا کے حکم سے 100 سے 150 افراد متاثر ہوئے ہیں۔ متاثرہ علاقے میں مستقل رہائش گاہوں کے ساتھ ساتھ گرمیوں میں استعمال ہونے والے کاٹیجز بھی موجود ہیں۔
متاثرہ رہائشیوں کا کہنا ہے کہ وہ شدید بے یقینی کا شکار ہیں۔ بعض افراد نے گھروں سے ضروری سامان لے کر محفوظ مقامات کا رخ کر لیا ہے، جبکہ کچھ مقامی رہائشی حالات پر نظر رکھتے ہوئے ابھی اپنے گھروں میں موجود ہیں، تاہم انہوں نے ہنگامی انخلا کے لیے سامان تیار رکھا ہے۔
حکام نے دیہی علاقوں کے تمام رہائشیوں کو ہدایت کی ہے کہ جنگلاتی آگ کے موجودہ موسم کے پیش نظر کسی بھی وقت انخلا کے لیے تیار رہیں۔
