ٹورنٹو(اونٹاریو لاٹری اینڈ گیمنگ، سی بی سی)کینیڈا میں بہتر زندگی کے خواب لے کر آنے والے ٹورنٹو کے ایک بہن بھائی نے لاٹو میکس کے 7 کروڑ 50 لاکھ کینیڈین ڈالر کے جیک پاٹ کا انعام جیت لیا۔
اونٹاریو لاٹری اینڈ گیمنگ کے مطابق جوناتھن آر اور مائلین پی نے 3 مارچ 2026 کی قرعہ اندازی میں یہ بھاری رقم جیتی۔ ادارے کی نئی پالیسی کے تحت فاتحین کے مکمل نام جاری نہیں کیے جاتے اور صرف پہلا نام اور آخری نام کا ابتدائی حرف ظاہر کیا جاتا ہے۔
فاتحین نے بتایا کہ وہ گزشتہ تقریباً دو برس سے مشترکہ طور پر لاٹری کھیل رہے تھے اور ایسے نمبرز کا انتخاب کرتے تھے جو ان اور ان کے خاندان کے لیے خاص اہمیت رکھتے تھے۔ خوش قسمت ٹکٹ شمالی یارک کے علاقے میں واقع ایک سہولت اسٹور سے خریدا گیا تھا۔
جوناتھن نے کہا کہ وہ سب سے پہلے اپنے والدین، اہلیہ اور بچوں کا خیال رکھیں گے، جبکہ ان کے بچوں کی تعلیم کے تمام اخراجات بھی اب پورے کیے جائیں گے۔
مائلین نے کہا کہ وہ ہمیشہ اپنا گھر بنانے کا خواب دیکھتی تھیں اور اب اس خواب کو حقیقت میں بدل سکیں گی۔ ان کا کہنا تھا کہ وہ دوسروں کے خوبصورت گھروں کی صفائی کر کے روزگار کماتی رہی ہیں اور اب اپنے نئے گھر کی صفائی خود کریں گی۔
دونوں بہن بھائیوں نے کہا کہ وہ اس رقم سے سفر بھی کریں گے۔ مائلین جرمنی، آسٹریا اور جاپان جانا چاہتی ہیں جبکہ پورے خاندان کے ساتھ چھٹیاں منانے کا بھی ارادہ رکھتی ہیں۔ ان کا کہنا تھا کہ وہ کینیڈا کے مختلف علاقوں کی سیر بھی کرنا چاہتے ہیں۔
جوناتھن نے بتایا کہ جب انہوں نے لاٹری کی موبائل ایپ پر ٹکٹ چیک کیا تو ابتدا میں انہیں لگا کہ انہوں نے صرف 75 ہزار ڈالر جیتے ہیں، لیکن عینک لگا کر دوبارہ دیکھنے پر اضافی صفر نظر آئے اور معلوم ہوا کہ اصل انعام 7 کروڑ 50 لاکھ ڈالر ہے۔
انہوں نے فوراً اپنی بہن کو جگایا، جبکہ مائلین نے بتایا کہ ابتدا میں انہیں بھی 75 ہزار ڈالر ہی لگے، مگر صفر گننے کے بعد حقیقت سامنے آئی تو وہ خوشی سے آبدیدہ ہو گئیں۔ ان کا کہنا تھا کہ اتنی بڑی کامیابی کا خواب تو ہمیشہ دیکھا تھا، لیکن کبھی یقین نہیں تھا کہ یہ حقیقت بن جائے گا۔
