نیومارکیٹ، اونٹاریو (کینیڈین پریس، گلوبل نیوز، اے پی) خودکشی میں معاونت کے 14 مقدمات میں مجرم قرار دیے گئے کینتھ لا کی سزا کے تعین کی سماعت نیومارکیٹ کی عدالت میں شروع ہوگئی، جہاں متاثرہ افراد کے اہل خانہ عدالت میں اپنے بیانات ریکارڈ کرائیں گے۔
کینتھ لا نے مئی میں اونٹاریو میں 14 افراد کی خودکشی میں معاونت کے الزامات میں جرم قبول کیا تھا۔ استغاثہ کے مطابق کینتھ لا نے ایسی ویب سائٹس چلائیں جہاں خودکشی کے لیے استعمال ہونے والی اشیا فروخت کی جاتی تھیں۔
عدالت میں پیش کیے گئے حقائق کے مطابق کینتھ لا نے 40 سے زائد ممالک میں تقریباً 1200 پارسل بھیجے، جن میں تقریباً 160 کینیڈا کے پتے پر بھیجے گئے تھے۔ اس نے جنوری 2020 سے مئی 2023 تک اپنی کمپنیوں کے ذریعے تقریباً 290 ہزار ڈالر کی فروخت کی رقم وصول کی۔
کینتھ لا کے خلاف پہلے درجے کے قتل کے مزید 14 الزامات بھی عائد کیے گئے تھے، تاہم استغاثہ نے کہا ہے کہ سزا سنائے جانے کے بعد یہ الزامات واپس لے لیے جائیں گے۔
کینیڈا میں خودکشی میں معاونت کے جرم میں زیادہ سے زیادہ 14 سال قید کی سزا ہوسکتی ہے۔ چار روزہ سماعت کے دوران استغاثہ اور دفاع سزا سے متعلق اپنے دلائل پیش کریں گے جبکہ متاثرہ خاندان اپنے پیاروں کی اموات کے اثرات سے متعلق عدالت کو آگاہ کریں گے۔
کینتھ لا سے منسلک اشیا استعمال کرنے والے برطانیہ میں 79 افراد کی اموات سے متعلق حقائق بھی کینیڈا کے مقدمے میں شامل کیے گئے ہیں۔ برطانیہ کی نیشنل کرائم ایجنسی نے کہا ہے کہ ابتدائی طور پر کینتھ لا کی حوالگی کی درخواست پر غور کیا گیا تھا، تاہم برطانیہ سے متعلق جرائم کو کینیڈا کی عدالتی کارروائی میں شامل کرنے پر اتفاق کیا گیا۔
کینیڈین نشریاتی ادارے کی تحقیقات کے مطابق کینتھ لا کا دنیا بھر میں کم از کم 147 اموات سے تعلق ہونے کا شبہ ظاہر کیا گیا ہے، تاہم موجودہ سزا کی کارروائی اونٹاریو میں 14 اموات سے متعلق مقدمات پر مرکوز ہے۔
