اسلام آباد ہائی کورٹ کا 26 نومبر تک حکمِ امتناع، الیکشن کمیشن اور دیگر فریقین سے جواب طلب
اسلام آباد (خبر ایجنسیاں) اسلام آباد ہائی کورٹ نے وفاقی دارالحکومت میں بلدیاتی انتخابات کے لیے الیکشن کمیشن کا جاری کردہ انتخابی پروگرام معطل کرتے ہوئے 20 دسمبر کو ہونے والی پولنگ روک دی ہے۔
جسٹس عمیر مجید ملک نے شہری امجد علی کی درخواست پر سماعت کے بعد حکمِ امتناع جاری کیا۔ عدالت نے الیکشن کمیشن کا 21 اکتوبر 2026ء کا نوٹیفکیشن اور انتخابی شیڈول آئندہ سماعت تک معطل کردیا اور الیکشن کمیشن سمیت دیگر متعلقہ فریقین کو نوٹس جاری کرتے ہوئے 26 نومبر تک جواب طلب کرلیا۔
درخواست گزار کے وکیل بیرسٹر قاضی عادل عزیز نے مؤقف اختیار کیا کہ الیکشن کمیشن نے انتخابی حلقہ بندیوں کے قانونی تقاضے پورے کیے بغیر انتخابات کا پروگرام جاری کیا۔ ان کے مطابق اسلام آباد کے بلدیاتی نظام سے متعلق 2026ء کا آرڈیننس اپنی آئینی مدت پوری ہونے کے بعد غیر مؤثر ہوگیا تھا، جس کے نتیجے میں 2015ء کا بلدیاتی قانون دوبارہ نافذ العمل ہوگیا۔
وکیل نے عدالت کو بتایا کہ 2026ء کے آرڈیننس کے تحت اسلام آباد میں یونین کونسلوں کی تعداد 125 سے بڑھا کر 130 کردی گئی تھی اور حلقہ بندیوں کا طریقہ بھی تبدیل کیا گیا تھا، تاہم آرڈیننس ختم ہونے کے بعد 2015ء کے قانون کے تحت انتخابات کرانے کے لیے نئی حلقہ بندیاں اور انتخابی فہرستیں مرتب کرنا ضروری تھا۔
درخواست گزار کے وکیل کے مطابق 2015ء کے قانون میں ہر یونین کونسل کو 9 وارڈز میں تقسیم کرنے کی شق موجود ہے، جبکہ موجودہ انتخابی پروگرام میں اس قانونی تقاضے کو پورا نہیں کیا گیا۔ انہوں نے مؤقف اختیار کیا کہ مطلوبہ قانونی کارروائی مکمل کیے بغیر انتخابات کرانا آئین اور انتخابی قوانین کے منافی ہوگا۔
عدالت نے ابتدائی دلائل سننے کے بعد انتخابی پروگرام معطل کردیا اور معاملے کی مزید سماعت 26 نومبر تک ملتوی کردی۔
واضح رہے کہ اسلام آباد میں آخری بلدیاتی انتخابات 2015ء میں ہوئے تھے اور منتخب بلدیاتی حکومت کی مدت فروری 2021ء میں ختم ہوگئی تھی۔ اس کے بعد حلقہ بندیوں اور بلدیاتی قوانین میں تبدیلیوں کے باعث متعدد مرتبہ انتخابی عمل تعطل کا شکار ہوا۔ الیکشن کمیشن نے تازہ شیڈول کے تحت 20 دسمبر 2026ء کو پولنگ کرانے کا اعلان کیا تھا، جسے اب عدالت نے معطل کردیا ہے۔
