برامپٹن(نمائندہ خصوصی) برامپٹن ساؤتھ سے رکن پارلیمنٹ سونیا سدھو نے وفاقی حکومت کی جانب سے کینیڈا کے پہلے اسٹریٹجک ایکسپورٹس آفس کے قیام کا خیرمقدم کرتے ہوئے کہا ہے کہ اس اقدام سے کینیڈین کمپنیوں کو بڑے بین الاقوامی معاہدے حاصل کرنے اور تیزی سے ترقی کرتی عالمی منڈیوں تک رسائی میں مدد ملے گی۔
اس دفتر کے قیام کا اعلان وفاقی وزیر برائے بین الاقوامی تجارت منیندر سدھو نے برامپٹن ساؤتھ میں قائم ایم ڈی اے اسپیس میں کیا، جو کینیڈین جدت، خلائی ٹیکنالوجی اور دفاعی صنعت کا ایک نمایاں ادارہ اور علاقے کا اہم آجر ہے۔
پریس ریلیز کے مطابق گلوبل افیئرز کینیڈا کے تحت قائم ہونے والا اسٹریٹجک ایکسپورٹس آفس سفارتی، مالیاتی اور تجارتی مہارت کو یکجا کرتے ہوئے فضائی، دفاعی، بنیادی ڈھانچے اور توانائی سمیت مختلف شعبوں میں کام کرنے والی کینیڈین کمپنیوں کی معاونت کرے گا۔ یہ دفتر تجارتی رکاوٹیں دور کرنے، حکومتی معاونت کو مربوط بنانے اور عالمی منڈیوں میں نئے کاروباری مواقع پیدا کرنے میں کردار ادا کرے گا۔
رکن پارلیمنٹ سونیا سدھو نے کہا کہ کینیڈین کمپنیاں عالمی معیار کی ٹیکنالوجی تیار کر رہی ہیں اور وہ عالمی معیار کی حکومتی معاونت کی مستحق ہیں۔ انہوں نے کہا کہ اسٹریٹجک ایکسپورٹس آفس کے قیام سے برامپٹن ساؤتھ سمیت ملک بھر کے کاروباری اداروں اور جدت طراز کمپنیوں کو عالمی منڈی میں کامیاب ہونے کے لیے ضروری وسائل اور سہولتیں فراہم کی جائیں گی۔
انہوں نے کہا کہ وفاقی بجٹ 2025 میں اس دفتر کے قیام کا اعلان کینیڈا کی اس وسیع تجارتی حکمت عملی کا حصہ تھا، جس کا مقصد برآمدات کو متنوع بنانا اور امریکی منڈی پر انحصار کم کرنا ہے۔ حکومت نے آئندہ دس برسوں میں امریکا کے علاوہ دیگر ممالک کو برآمدات دوگنی کرنے کا ہدف مقرر کیا ہے، جس کی بنیاد 2025 اور 2026 کے دوران حاصل ہونے والی مضبوط تجارتی پیش رفت پر رکھی گئی ہے۔
وفاقی وزیر منیندر سدھو نے کہا کہ اسٹریٹجک ایکسپورٹس آفس حکومتی سطح پر ایک مؤثر رابطہ کار کے طور پر کام کرے گا اور کینیڈین کمپنیوں کو پیچیدہ عالمی منڈیوں میں رہنمائی فراہم کرتے ہوئے زیادہ مالیت کے بین الاقوامی معاہدے حاصل کرنے میں مدد دے گا۔
انہوں نے بتایا کہ گزشتہ سال کینیڈا نے ملکی کمپنیوں کے لیے 28 ارب ڈالر سے زائد مالیت کے بین الاقوامی تجارتی معاہدوں کے حصول میں معاونت فراہم کی، جبکہ نئے دفتر کے ذریعے اس کامیابی کو مزید وسعت دی جائے گی۔
سونیا سدھو نے ایم ڈی اے اسپیس کے چیف ایگزیکٹو آفیسر مائیک گرینلی اور ان کی ٹیم کا تقریب کی میزبانی پر شکریہ ادا کرتے ہوئے کہا کہ ایم ڈی اے اسپیس کینیڈین جدت اور فضائی و دفاعی صنعت میں ملک کی صلاحیتوں کی بہترین مثال ہے اور یہی وجہ ہے کہ کینیڈا کو اپنی کمپنیوں کی عالمی سطح پر بھرپور سرپرستی جاری رکھنی چاہیے۔
پریس ریلیز کے مطابق اسٹریٹجک ایکسپورٹس آفس فوری طور پر اپنی سرگرمیاں شروع کرے گا اور صنعتی شراکت داروں، وفاقی محکموں اور دنیا بھر میں موجود کینیڈین سفارتی مشنز کے ساتھ مل کر کام کرے گا۔
