ٹورنٹو (نمائندہ خصوصی) بونی کرومبی نے حال ہی میں اپنی زندگی کے ایک اہم سنگ میل کی سالگرہ منائی. ایک ایسی عمر جو عام طور پر بڑی تقریب یا کم از کم خاندان اور قریبی دوستوں کے ساتھ خصوصی ملاقات کا موقع ہوتی ہے لیکن اس کے بجائے، وہ ایک دفتر میں بیٹھی مناظرے کی تیاری کر رہی تھیں۔
بڑے دن سے پہلے، اونٹاریو لبرل پارٹی کی رہنما نے ایک انٹرویو دیا، اور ایسا لگا کہ اپنے پیاروں کے ساتھ نہ ہونے کا خیال اُن کیلئےعمر کی تعداد سے زیادہ بھاری تھا۔
لیکن کرومبی کیلئے جنہوں نے 47 سال کی عمر میں اپنی سیاسی زندگی کا آغاز کیا اور اب 65 سال کی عمر میں ایک طوفانی انتخابی مہم کے بیچ میں ہیں، یہ موقع عمر پر مبنی تعصب اور اُن دہری معیارات پر غور کرنے کا باعث بنا جو زندگی کے کئی شعبوں میں خواتین کیلئےموجود ہیں۔
2023 کی لبرل قیادت کی دوڑ کے دوران، جب ان کے ساتھی امیدوار نیٹ ایرسکن سمتھ نے یہ تجویز دی کہ کرومبی بطور لیڈر متعدد انتخابی ادوار تک نہیں ٹکیں گی، تو انہوں نے سخت جواب دیا۔ کرومبی نے ان تبصروں کو عمر پر مبنی تعصب قرار دیااور یہ باتیں آج بھی یاد رکھی جاتی ہیں۔
انہوں نے حالیہ انٹرویو میں کہا، “میرے خیال میں خواتین کو مختلف انداز میں پرکھا جاتا ہے، آپ جانتے ہیں، اور اس حوالے سے تبصروں میں کافی باریکیاں اور نرمی ہوتی ہے، جیسا کہ ہم نے (ایرسکن-سمتھ کے) تبصروں میں دیکھا، لیکن کچھ حملہ آور اشتہارات میں بھی جو میں دیکھ رہی ہوں۔”
انہوں نے خاص طور پر پروگریسیو کنزرویٹیوز کے مشہور “بونی، کون؟” اشتہارات کا حوالہ دیا، جو ان کی قیادت جیتنے کے فوراً بعد نشر ہونا شروع ہو گئے تھے۔کرومبی نے کہا، “پورا یہ ‘وہ مہنگی ہے’ (اشتہار میں دیا گیا تبصرہ)، اس کا اصل میں کیا مطلب ہے؟”
ڈارسی میکفیڈن، جو کرومبی کی سیاسی مہمات پر کام کر چکی ہیں جب سے وہ پہلی بار مسی ساگا سٹی کونسل کیلئے کھڑی ہوئیں، نے کہا کہ یہ حملے کرومبی کو مزید متحرک کر دیتے ہیں۔
کرومبی کی پہلی مسی ساگا میئرل ریس میں ایک مخالف نے ان کی کارپوریٹ قابلیت پر سوال اٹھایا، جس پر کرومبی سخت ناراض ہوئیں۔ میکفیڈن کے مطابق، وہ گھر گئیں اور اپنے کاروباری کارڈز اور پرانے سیکیورٹی پاسز نکال کر اپنی قابلیت ثابت کرنے لگیں۔
“میں ان تمام مہمات کو یاد کرتی ہوں جن میں میں نے ان کے ساتھ کام کیا، جہاں ہم کسی مسئلے کے خلاف لڑنے کیلئے میدان میں اترے اور ایسے مواقع پر، ایک نہایت مخلص اور خوبصورت بونی سامنے آتی ہیں،” انہوں نے کہا۔”یہ وہ موقع ہوتا ہے جب وہ خود کو کسی حد تک کمزور محسوس کرتی ہیں، شاید، اور کسی چیلنج یا کسی غلط الزام کا سامنا کرتی ہیں.یہ انہیں پسند نہیں، لیکن میں جانتی ہوں کہ وہ اسے برداشت بھی نہیں کریں گی اور نہ ہی خاموش رہیں گی۔”
کرومبی کنزرویٹو پارٹی کے اشتہارات کو اپنی شخصیت کے خلاف ایک غلط تاثر پیدا کرنے کی کوشش سمجھتی ہیں۔ اسی لیے وہ اپنی پرورش کے بارے میں کھل کر بات کرتی ہیں، تاکہ ڈوگ فورڈ کے پس منظر سے اپنا موازنہ کر سکیں، جو ایک خوشحال خاندان میں پلے بڑھے اور خاندانی کاروبار میں ملازمت کی۔
“میں بھی ایٹو بیکوک میں پلی بڑھی، لیکن میری زندگی بالکل مختلف تھی،” انہوں نے کہا۔ “میں ایک عام سے پس منظر میں پلی بڑھی اور محض اپنی محنت سے ایک مخصوص کامیابی حاصل کی۔ مجھے کچھ بھی وراثت میں نہیں ملا۔”
ان کے والد شراب نوشی کے عادی تھے، اور جب وہ تین سال کی تھیں تو ان کے والدین میں علیحدگی ہوگئی۔ کرومبی کہتی ہیں کہ اس وقت طلاق کا تصور بھی نہیں تھا، لیکن ان کی والدہ اپنی اکلوتی بیٹی کیلئےبہتر زندگی چاہتی تھیں، اس لیے وہ اپنے والدین کے مغربی ٹورنٹو میں چلائے جانے والے ایک کرائے کے مکان کے ایک کمرے میں منتقل ہو گئیں تاکہ گزر بسر ہو سکے۔
بچپن میں انہیں کبھی یہ محسوس نہیں ہوا کہ انہیں کسی چیز کی کمی ہے۔ وہ یاد کرتی ہیں کہ کیسے وہ اور ان کی والدہ بطور تفریح اسٹریٹ کار میں سفر کرکے “نٹ کریکر بیلے” دیکھنے جایا کرتی تھیں، یا کیسے کئی سال بعد، جب ان کی والدہ نے دوسری شادی کر لی، وہ اپنے سوتیلے والد کے ساتھ وساگا بیچ کی سیر پر گئی تھیں۔
“انہوں نے ایک دن اعلان کیا کہ وہ ہمارے پڑوسی کے بہترین دوست سے شادی کر رہی ہیں۔ یہ میرے لیے واقعی دلچسپ تھا کیونکہ میں نے سوچا، ‘آہ، اسی لیے وہ ہمیشہ ہمارے گھر کے آس پاس موجود ہوتے تھے،'” کرومبی نے مسکراتے ہوئے کہا۔ “وہ ایک بہت اچھے انسان تھے۔”
لیکن ان کے والد کی مشکلات سے بھری زندگی اور ان کی عدم موجودگی نے ان پر ایک گہرا اثر چھوڑا۔زندگی کے آخری دنوں میں، کرومبی نے ٹورنٹو کے ایک بے گھر افراد کے شیلٹر میں اپنے والد سے دو بار ملاقات کی، جہاں وہ مقیم تھے، حالانکہ وہ انہیں سات سال کی عمر سے نہیں ملی تھیں۔
“میں نے بچپن کے بعد انہیں نہیں دیکھا تھا۔ اور جب وہ وفات پا گئے تو مجھے فون آیا۔ میں نے کہا، ‘مجھے یہ سن کر بہت افسوس ہوا، اب آگے کیا ہوگا؟’ تو انہوں نے کہا، ‘یہ آپ کو فیصلہ کرنا ہے کیونکہ آپ ہی قریبی رشتہ دار ہیں۔'” کرومبی یہ یاد کرتے ہوئے آبدیدہ ہوگئیں۔
ایلیکس کرومبی، جو کہ بونی کرومبی کے سب سے بڑے بیٹے ہیں، کہتے ہیں کہ ان کی ماں کا بچپن ان کی شخصیت پر گہرا اثر ڈال چکا ہے۔”میرے خیال میں انہی تجربات کی وجہ سے وہ حقیقی طور پر ہمدرد ہیں،” انہوں نے کہا۔ “وہ واقعی ان مسائل کی پرواہ کرتی ہیں جن پر زیادہ تر سیاستدان صرف بات کرتے ہیں۔”
ایلیکس کرومبی نے بتایا کہ ان کی والدہ میں ایک نہ ختم ہونے والی توانائی ہے.جس کی وجہ سے ان کی ٹیم انہیں “اینرجائزر بونی” کہتی ہے۔ انہیں کھانے پکانے اور بڑے خاندانی مباحثے منعقد کرنے کا شوق ہے، اور وہ اپنے تینوں بچوں کے ساتھ قریبی تعلق رکھتی ہیں۔ ایلیکس، جو اس وقت اوٹاوا میں ہیں، کو ہر ہفتے کم از کم ایک بار فیس ٹائم پر ان کی کال آتی ہے۔
انہوں نے یہ بھی بتایا کہ ان کی والدہ کا مزاح خشک اور طنزیہ نوعیت کا ہے۔حال ہی میں، کرومبی نے مہم کے دوران ایک مذاق کیا تھا کہ وہ ڈَگ فورڈ کو پوش اپ مقابلے کیلئےچیلنج کر سکتی ہیں۔ یہ مذاق سپر باؤل کے اشتہارات پر گفتگو کے دوران ہوا تھا، اور اگرچہ یہ توقع کے مطابق اثر انداز نہیں ہوا، لیکن ان کی ٹیم کی رکن مک فیڈن کا کہنا تھا کہ اس سے ایک سیاستدان کا بے ساختہ اور اصل چہرہ سامنے آتا ہے۔
“جتنا زیادہ کوئی غیر فلٹرڈ اور حقیقی ہوتا ہے، اتنا ہی وہ دلچسپ لگتا ہے، اور لوگ اسے بہتر طریقے سے جان پاتے ہیں،” مک فیڈن نے کہا۔جو لوگ کرومبی کو قریب سے جانتے ہیں، وہ کہتے ہیں کہ وہ واقعی جسمانی فٹنس کا خیال رکھتی ہیں اور بلاشبہ پوش اپ مقابلہ جیت سکتی ہیں۔ کرسمس کے بعد، وہ اپنے ساتھی کے ساتھ ایریزونا میں راک کلائمبنگ کیلئےگئیں۔
حالانکہ کرومبی اپنی ذاتی زندگی پر زیادہ بات نہیں کرتیں، لیکن انہوں نے یہ ضرور کہا کہ ان کا ساتھی سیاست میں نہیں ہے۔ “خدا نہ کرے!” انہوں نے مذاق میں کہالیکن وہ پہلی بار سیاست میں ایک ہائی اسکول کے لڑکے کی وجہ سے آئی تھیں۔
“اس نے مجھ سے پوچھا، ‘تمہارا ویک اینڈ پر کیا پلان ہے؟’ اور میں بہت پرجوش ہو گئی،” وہ یاد کرتی ہیں۔ “میں نے کہا، ‘کچھ خاص نہیں، کیوں؟’ اس نے کہا، ‘کیا تم میرے ساتھ فلائرز تقسیم کرنے آنا چاہو گی؟'”بعد میں انہیں معلوم ہوا کہ اس لڑکے کے چچا ایک کابینہ وزیر تھے اور پولش نژاد تھے، جیسے ان کا اپنا خاندان۔ انہیں یہ جان کر خوشی ہوئی کہ پولش نژاد افراد بھی اقتدار کے عہدوں تک پہنچ سکتے ہیں۔
“پھر میں نے پیئر ٹروڈو کے بارے میں جانا اور یہ کہ وہ ہمارے ملک میں کیا تبدیلیاں لانا چاہتے تھے، حقوق و آزادیوں اور چارٹر کے بارے میں، اور یہ سب بہت دلچسپ لگا،” انہوں نے کہا۔ “یہ سب گہرے موضوعات تھے، اور میں بہت جلد سیاست سے جُڑ گئی۔”
کرومبی نے اپنا کیریئر کارپوریٹ دنیا میں شروع کیا، جہاں انہوں نے میکڈونلڈز، ڈزنی، انشورنس بیورو آف کینیڈا میں کام کیا، اور اپنے ایم بی اے پروگرام کی ایک ہم جماعت کے ساتھ مل کر ایک کاسمیٹکس کمپنی قائم کی۔ وہ اور ان کے اس وقت کے شوہر کیمبرج (میساچوسٹس)، لاس اینجلس اور وینکوور میں مقیم رہے، پھر واپس مسی ساگا میں بس گئے۔
انہوں نے کئی سیاسی مہمات پر کام کیا اور پھر خود کو امیدوار کے طور پر پیش کیا۔2008 سے 2011 تک وہ مسیساگا-اسٹریٹز ویل کی ایم پی کے طور پر خدمات انجام دیتی رہیں۔ الیکشن میں شکست کے بعد، مسیساگا کی مقبول ترین میئر ہیزل میک کالیون نے کرومبی کو سٹی کونسل کی نشست کیلئےانتخاب لڑنے کی ترغیب دی۔
بعد ازاں کرومبی نے ہیزل میک کالیون کی جگہ مسی ساگا کی میئر بن کر سنبھالی، جب میک کالیون 94 سال کی عمر میں ریٹائر ہوئیں، اور انہوں نے تین مدتوں تک اس تیزی سے ترقی پذیر شہر کی قیادت کی۔
ایلیکس کرومبی نے کہا کہ ان کی والدہ نے میونسپل سے صوبائی سیاست میں منتقلی کو بخوبی نبھایا اور وہ آج بھی مضبوطی سے کام کر رہی ہیں۔”میرے کئی دوست مجھ سے پوچھتے ہیں، ‘تمہاری ماں اتنے سالوں بعد بھی یہ سب کیوں کر رہی ہیں؟'” انہوں نے کہا۔
“اور اس کا سیدھا جواب یہ ہے کہ، سب سے پہلے، وہ ابھی بھی ان مسائل کی پرواہ کرتی ہیں جن پر وہ کام کر رہی ہیں، اور دوسرا، انہیں یہ سب کچھ کرنے میں واقعی مزہ آتا ہے۔ وہ نئے لوگوں سے ملنے کو بہت پسند کرتی ہیں . وہ ابھی بھی پوری توانائی کے ساتھ آگے بڑھ رہی ہیں۔”
