اسٹراسبرگ، فرانس(کینیڈین وزیراعظم ہاؤس، یورپی پارلیمنٹ) کینیڈا کے وزیراعظم مارک کارنی نے یورپی پارلیمنٹ کی صدر روبرٹا میٹسولا سے ملاقات کی، جس میں کینیڈا اور یورپی یونین کے درمیان دفاع، تجارت، توانائی، تعلیم، تحقیق، اہم معدنیات اور مصنوعی ذہانت سمیت مختلف شعبوں میں تعاون مزید مضبوط بنانے پر تبادلہ خیال کیا گیا۔
وزیراعظم مارک کارنی نے یورپی پارلیمنٹ سے خطاب کی دعوت دینے پر صدر روبرٹا میٹسولا کا شکریہ ادا کرتے ہوئے کہا کہ یہ دعوت کینیڈا اور یورپی یونین کے لیے ایک اہم اور فیصلہ کن وقت میں سامنے آئی ہے۔
ملاقات میں دونوں رہنماؤں نے موجودہ عالمی صورتحال کے تناظر میں کینیڈا اور یورپی یونین کی تزویراتی خودمختاری مضبوط بنانے اور تمام اہم تزویراتی صلاحیتوں میں تعاون گہرا کرنے پر بات چیت کی۔
دونوں رہنماؤں نے اہم معدنیات، دفاعی صنعتی صلاحیت، مصنوعی ذہانت اور کمپیوٹنگ، توانائی کے تحفظ، خلائی شعبے، مالیاتی خدمات اور ادائیگیوں سمیت مختلف شعبوں میں قریبی تعاون کی اہمیت پر زور دیا۔
روبرٹا میٹسولا نے یورپی پارلیمنٹ میں وزیراعظم مارک کارنی کا خیرمقدم کرتے ہوئے کہا کہ دفاع اور تجارت سے لے کر توانائی، تعلیم اور تحقیق تک متعدد شعبوں میں بہتر تعاون کے وسیع امکانات موجود ہیں۔
انہوں نے کہا کہ یورپی یونین اور کینیڈا کی دوستی مشترکہ اقدار اور نقطۂ نظر پر قائم ہے اور یہ اس مشترکہ سمجھ بوجھ پر مبنی ہے کہ مل کر کام کرنے کی صورت میں دونوں فریق زیادہ مضبوط ہوتے ہیں۔
روبرٹا میٹسولا نے کینیڈا اور یورپ کے تاریخی تعلقات کا حوالہ دیتے ہوئے کہا کہ کینیڈا کی تعمیر میں کردار ادا کرنے والے بہت سے افراد بہتر زندگی کی تلاش میں یورپ سے وہاں پہنچے تھے، جبکہ یورپ کے مشکل ترین ادوار میں کینیڈین عوام بھی یورپ کے ساتھ کھڑے رہے۔
انہوں نے پہلی اور دوسری عالمی جنگ کے دوران یورپ کی آزادی کے لیے کینیڈین فوجیوں کی قربانیوں کو خراج تحسین پیش کرتے ہوئے کہا کہ یورپ ان تمام افراد کی قربانیوں کو کبھی نہیں بھولے گا جنہوں نے آزادی اور جمہوریت کے دفاع کے لیے یورپ کا ساتھ دیا۔
یورپی پارلیمنٹ کی صدر نے کہا کہ گزشتہ روز کینیڈا اور یورپی یونین کے درمیان اتحاد کو مزید گہرا کرنے کی راہ ہموار کرنے کا اعلان ایک انتہائی مثبت پیش رفت ہے، جس سے بحر اوقیانوس کے دونوں جانب عوام، خاندانوں اور صنعتوں کے لیے اہم معاملات پر تعاون بڑھانے کے امکانات پیدا ہوئے ہیں۔
انہوں نے کہا کہ دونوں فریق مل کر نئے اور اہم شعبوں میں پیش رفت کرسکتے ہیں اور بالآخر عوام کی زندگیوں میں بہتری لا سکتے ہیں۔
ملاقات میں یورپی کمیشن کی صدر ارسولا فان ڈیر لاین کے یورپی یونین کی صورتحال سے متعلق خطاب پر بھی تبادلہ خیال کیا گیا، جس میں انہوں نے کینیڈا اور یورپی یونین کے جامع اقتصادی و تجارتی معاہدے سے آگے بڑھتے ہوئے مستقبل میں مزید مضبوط اور وسیع اتحاد قائم کرنے پر زور دیا تھا۔
مارک کارنی اور روبرٹا میٹسولا نے اتفاق کیا کہ کینیڈا اور یورپی یونین اپنی مشترکہ طاقتوں اور اقدار کی بنیاد پر مستقبل کے اس تعاون کی سمت خود طے کریں گے۔دونوں رہنماؤں نے قریبی رابطہ برقرار رکھنے پر بھی اتفاق کیا۔
