نئی دہلی(انڈین ایکسپریس، ہندوستان ٹائمز، این ڈی ٹی وی، ٹائمز آف انڈیا)بھارتی دارالحکومت نئی دہلی میں 49 سالہ خاتون پروفیسر دیبوسمیتا پال کو مبینہ طور پر جائیداد کے تنازع پر قتل کر دیا گیا، جبکہ پولیس نے مغربی بنگال سے ایک میاں بیوی اور ان کے کمسن بیٹے کو گرفتار کر لیا ہے۔
پولیس کے مطابق دیبوسمیتا پال دہلی یونیورسٹی کے شیواجی کالج میں اسسٹنٹ پروفیسر تھیں اور 4 جون کو مشرقی دہلی کے علاقے وسندھرا انکلیو میں واقع اپنے فلیٹ میں مردہ پائی گئی تھیں۔
تحقیقات کے دوران معلوم ہوا کہ ملزمان رام پرشاد داس، ان کی اہلیہ بنشری داس اور ان کا کمسن بیٹا 2023 سے مغربی بنگال کے ضلع بردھمان میں واقع مقتولہ کی آبائی جائیداد میں رہائش پذیر تھے۔ پروفیسر متعدد بار انہیں مکان خالی کرنے کا کہہ چکی تھیں، جس پر دونوں فریقوں کے درمیان تنازع جاری تھا۔
پولیس کا کہنا ہے کہ مقتولہ نے حال ہی میں ملزمان کو جائیداد خالی کرنے کی آخری تنبیہ کی تھی، جس کے بعد مبینہ طور پر قتل کی منصوبہ بندی کی گئی۔ ملزمان 3 جون کو دہلی پہنچے اور شناخت چھپانے کے لیے مبینہ طور پر دوسرے افراد کی شناختی دستاویزات کی تفصیلات استعمال کرتے ہوئے ایک مہمان خانے میں قیام کیا۔
تفتیشی حکام کے مطابق ملزمان مقتولہ کے فلیٹ پہنچے جہاں جائیداد کے تنازع پر گفتگو کے دوران انہیں قتل کر دیا گیا۔ واردات کے بعد فلیٹ کو باہر سے تالا لگا کر فرار ہو گئے۔
پولیس نے سی سی ٹی وی فوٹیج، موبائل فون کے ریکارڈ اور دیگر تکنیکی شواہد کی مدد سے ملزمان کا سراغ لگایا۔ حکام کے مطابق ملزمان واردات کے بعد ٹیکسی اور رکشے کے ذریعے آنند وہار پہنچے اور وہاں سے ریل گاڑی کے ذریعے مغربی بنگال فرار ہوگئے۔
پولیس نے دعویٰ کیا ہے کہ ملزمان کے قبضے سے مقتولہ کا موبائل فون، واردات میں استعمال ہونے والا مبینہ آلہ، کپڑے، ٹوپی، بیگ اور ریل کے ٹکٹ بھی برآمد کر لیے گئے ہیں۔
واقعے کا انکشاف اس وقت ہوا جب مقتولہ کی بہن بار بار رابطہ نہ ہونے پر فلیٹ پہنچی۔ دروازہ باہر سے بند ہونے پر انہوں نے تالا توڑ کر اندر داخل ہوئیں جہاں پروفیسر کی لاش موجود تھی۔پولیس نے مقدمہ درج کرکے مزید تحقیقات شروع کر دی ہیں جبکہ گرفتار ملزمان سے پوچھ گچھ جاری ہے۔
