اوٹاوا (بینک آف کینیڈا، گلوبل نیوز)کینیڈا کے مرکزی بینک نے بادشاہ چارلس سوم کی تصویر والے نئے عمودی 20 ڈالر کے نوٹ کی نقاب کشائی کردی۔
نئے نوٹ کی نقاب کشائی 3 ستمبر کو اوٹاوا میں منعقدہ تقریب کے دوران بینک آف کینیڈا کے گورنر ٹِف میکلم نے کی۔ تقریب میں کینیڈا کی گورنر جنرل لوئز آربر اور مالیاتی اداروں کے ذمہ دار سیکریٹری آف اسٹیٹ وین لانگ بھی شریک ہوئے۔
یہ کینیڈا کا پہلا بینک نوٹ ہے جس پر بادشاہ چارلس سوم کی تصویر شامل کی گئی ہے اور 70 سال سے زائد عرصے میں پہلی مرتبہ کسی نئے بادشاہ کی تصویر 20 ڈالر کے نوٹ پر ظاہر ہوئی ہے۔ اس سے قبل ملکہ الزبتھ دوم کی تصویر کینیڈین کرنسی پر نمایاں رہی تھی۔
بینک آف کینیڈا کے مطابق نئے نوٹ کے ڈیزائن میں بادشاہ چارلس سوم کی ماحول دوست سرگرمیوں اور ماحول کے تحفظ سے وابستگی کو اجاگر کرنے کے لیے پھولوں اور پتوں پر مشتمل نقش و نگار شامل کیے گئے ہیں۔ کینیڈا کے 13 صوبوں اور علاقوں کی نمائندگی ان کے متعلقہ پھولوں کی علامتوں کے ذریعے کی گئی ہے، جبکہ مقامی اقوام کے لیے ثقافتی اہمیت رکھنے والے پودوں کو بھی نوٹ کے ڈیزائن کا حصہ بنایا گیا ہے۔
نوٹ کے عقب پر فرانس میں واقع کینیڈین نیشنل ویمی یادگار کی تصویر برقرار رکھی گئی ہے، جو پہلی جنگ عظیم میں خدمات انجام دینے والے کینیڈین فوجیوں کی قربانیوں کی یاد دلاتی ہے۔
بینک آف کینیڈا کا کہنا ہے کہ نئے نوٹ میں جدید اور متحرک حفاظتی خصوصیات شامل کی گئی ہیں، جن کا مقصد جعلی کرنسی کی روک تھام اور کینیڈین شہریوں کے اعتماد کو برقرار رکھنا ہے۔
نیا عمودی 20 ڈالر کا نوٹ فروری 2027 کے آخر سے بتدریج گردش میں لایا جائے گا۔ اس سے قبل بینک نقد رقم سنبھالنے والی مشینوں میں نئے نوٹ کی آزمائش کرے گا اور مالیاتی اداروں، دکانداروں اور قانون نافذ کرنے والے اداروں کے ساتھ مل کر اس کی حفاظتی خصوصیات سے متعلق آگاہی فراہم کرے گا۔
