اوٹاوا(نمائندہ خصوصی)کینیڈا کی سیکریٹری آف اسٹیٹ برائے جرائم کی روک تھام روبی سہوتا نے ہاؤس آف کامنز میں بل C-2، یعنی Strong Borders Act کے اہم نکات پیش کیے، جس کے تحت بچوں کے جنسی استحصال کے کیسز میں پولیس کیلئے تحقیقات آسان ہو جائیں گی۔
روبی سہوتا نے کہا کہ حال ہی میں انہوں نے پولیس چیفز کے اجلاس میں شرکت کی اور صدر نے بل C-2 کیلئے تعریفی کلمات کہے۔بل C-2 کے تحت ایک اہم شق، lawful access، پولیس کو ڈیٹا تک رسائی کیلئے موجودہ معیار “reasonable grounds to believe” سے بدل کر “reasonable grounds to suspect” کر دیتی ہے۔ سہوتا کے مطابق یہ تبدیلی بچوں کے جنسی استحصال کے کیسز میں تحقیقات کو “اہم قدم آگے بڑھانے” میں مدد دے گی۔
انہوں نے ایک مثال دیتے ہوئے بتایا کہ ایک والد نے اپنی 12 سالہ بیٹی کو کسی آن لائن گفتگو میں پایا، جس میں وہ شخص اپنا عمر چھپا کر ایک نوجوان ظاہر کر رہا تھا لیکن حقیقت میں بالغ تھا۔ والد کے پاس IP ایڈریس موجود تھا لیکن پولیس اس پر موجودہ قوانین کے تحت کارروائی نہیں کر پا رہی تھی۔ سہوتا کے مطابق، نئے بل کے تحت پولیس اس معاملے کو آگے بڑھا کر مقدمہ درج کر سکے گی۔
سہوتا نے کہا، “C-2 بچوں کے تحفظ کیلئے پولیس کو مؤثر بنانے اور ایسے کیسز میں انصاف یقینی بنانے کی راہ ہموار کرے گا۔”
مزید برآں، سہوتا نے پولیس افسران کی قربانیوں کا اعتراف کرتے ہوئے کہا”پولیس افسران ہر دن اپنی جان کو خطرے میں ڈال کر ہمارے معاشروں کو محفوظ بناتے ہیں۔ وہ اکثر معاشرے کے بدصورت پہلو کا سامنا کرتے ہیں تاکہ ہمیں اس کا سامنا نہ کرنا پڑے۔”
انہوں نے York Regional Police Association اور Toronto Police Association کے نمائندوں کے ساتھ حالیہ ملاقات کا ذکر کیا اور کہا کہ کینیڈا کی نئی حکومت ہمیشہ فرنٹ لائن ہیروز کے ساتھ تعاون کرنے کے لیے تیار ہے تاکہ کمیونٹی سیفٹی کو بہتر بنایا جا سکے۔
سہوتا نے کہا، “C-2 بچوں کے تحفظ کے لیے پولیس کو مؤثر بنانے اور ایسے کیسز میں انصاف یقینی بنانے کی راہ ہموار کرے گا، اور ہم فرنٹ لائن افسران کے ساتھ تعاون جاری رکھیں گے۔”
