ہیوسٹن( رائٹرز، بین الاقوامی اسپورٹس میڈیا)فیفا ورلڈ کپ 2026 کے گروپ ای کے میچ میں چار مرتبہ کی عالمی چیمپئن جرمنی نے پہلی بار میگا ایونٹ میں شریک کوراساؤ کو ایک کے مقابلے میں سات گول سے شکست دے کر اپنی مہم کا شاندار آغاز کیا۔
ہیوسٹن میں کھیلے گئے میچ میں جرمنی نے چھٹے ہی منٹ میں فیلکس نمیشا کے گول کی بدولت برتری حاصل کرلی، تاہم کوراساؤ کے کھلاڑیوں نے بھرپور مزاحمت کرتے ہوئے 21ویں منٹ میں لیوانو کومینینسیا کے ذریعے گول کرکے مقابلہ ایک، ایک سے برابر کردیا، جو ورلڈ کپ میں کوراساؤ کی تاریخ کا پہلا گول بھی تھا۔
میچ برابر ہونے کے بعد جرمنی نے کھیل پر مکمل کنٹرول حاصل کرلیا اور مسلسل حملوں کے ذریعے مزید چھ گول اسکور کیے۔ نیکو شلوٹربیک، جمال موسیالا، ناتھنئیل براؤن اور ڈینیز انڈاو نے ایک، ایک گول کیا جبکہ کائی ہیورٹز نے دو مرتبہ گیند جال میں پہنچا کر ٹیم کی بڑی کامیابی میں اہم کردار ادا کیا۔
کوراساؤ اگرچہ بھاری مارجن سے میچ ہار گیا، تاہم عالمی کپ میں اپنی پہلی شرکت کے دوران جرمنی جیسے مضبوط حریف کے خلاف پہلا تاریخی گول اسکور کرنا ٹیم کے لیے ایک یادگار لمحہ بن گیا۔
