کھٹمنڈو ( رائٹرز، بھارتی میڈیا)نیپال میں دنیا کی بلند ترین چوٹی ماؤنٹ ایورسٹ سر کرنے والے 2 بھارتی کوہ پیما واپسی کے دوران ہلاک ہو گئے۔بھارتی میڈیا کے مطابق نیپالی حکام کا کہنا ہے کہ ارون تیواری اور سندیپ آرے نے چوٹی سر کر لی تھی تاہم واپسی کے دوران شدید تھکن اور جسمانی حالت خراب ہونے کے باعث جان کی بازی ہار گئے۔
ایکسپیڈیشن آپریٹرز ایسوسی ایشن نیپال کے سیکریٹری جنرل رشی بھنڈاری کے مطابق سندیپ آرے کو ’بالکونی‘ سے ’ساؤتھ کول‘ تک منتقل کرنے کی کوشش کی گئی لیکن وہ جانبر نہ ہو سکے۔
دوسری جانب ارون تیواری ’ہلیری اسٹیپ‘ کے قریب شدید تھکن کا شکار ہوئے اور 4 شیرپا گائیڈز کی کوششوں کے باوجود انہیں بچایا نہ جا سکا۔واضح رہے کہ بدھ کے روز نیپال کی جانب سے ایک ہی دن میں ریکارڈ 274 کوہ پیما ماؤنٹ ایورسٹ کی چوٹی تک پہنچے تھے۔رواں سال نیپال نے 500 پرمٹ جاری کیے ہیں جو 1953ء کے بعد اب تک کی سب سے بڑی تعداد ہے۔
