واشنگٹن (امریکی محکمۂ خارجہ، رائٹرز، ایسوسی ایٹڈ پریس، اے ایف پی)امریکی محکمۂ خارجہ نے مغربی ایشیا میں کشیدہ صورتحال کے پیش نظر امریکی شہریوں کے لیے نئی سفری ہدایات جاری کرتے ہوئے انہیں ممکنہ ہنگامی سفری صورتحال کے لیے تیار رہنے کی ہدایت کی ہے۔
امریکی محکمۂ خارجہ، رائٹرز، ایسوسی ایٹڈ پریس اور اے ایف پی کے مطابق جاری کردہ سفری ہدایت میں کہا گیا ہے کہ ایران سے متعلق جاری کشیدگی کے باعث خطے میں سکیورٹی کی صورتحال تیزی سے تبدیل ہو سکتی ہے، اس لیے امریکی شہری پیشگی منصوبہ بندی کریں اور ہنگامی حالات کے لیے تیار رہیں۔
محکمۂ خارجہ نے خبردار کیا کہ ایران سے متعلق جنگی صورتحال کے باعث پروازوں کی منسوخی، فضائی حدود کی بندش اور فضائی سفر میں تعطل پیدا ہونے کا امکان ہے، جس سے سفر کے نظام الاوقات متاثر ہو سکتے ہیں۔
اعلامیے میں امریکی شہریوں کو ہدایت کی گئی ہے کہ وہ مقامی حالات پر مسلسل نظر رکھیں، امریکی سفارت خانوں اور قونصل خانوں کی ہدایات پر عمل کریں اور ضرورت پڑنے پر فوری سفری انتظامات کے لیے تیار رہیں۔
