میامی(فیفا)فیفا ورلڈ کپ 2026ء میں پرتگال اور کانگو کے درمیان کھیلا گیا دلچسپ مقابلہ ایک، ایک گول سے برابر ہوگیا، دونوں ٹیموں نے اپنے اپنے گول پہلے ہاف میں اسکور کیے، جبکہ دوسرے ہاف میں پرتگال کا ایک گول آف سائیڈ قرار دے دیا گیا۔
میچ کا آغاز پرتگال کے لیے شاندار رہا اور صرف چھٹے منٹ میں ژاؤ ناویس نے گیند کو جال میں پہنچا کر اپنی ٹیم کو ایک، صفر کی برتری دلا دی۔تاہم کانگو نے ہمت نہیں ہاری اور مسلسل حملوں کا سلسلہ جاری رکھا۔ پہلے ہاف کے اختتام سے قبل یان ویسا نے گول اسکور کرکے مقابلہ ایک، ایک سے برابر کردیا، جس کے بعد دونوں ٹیمیں برابر اسکور کے ساتھ وقفے میں گئیں۔
دوسرے ہاف میں پرتگال نے ایک بار پھر برتری حاصل کرنے کی کوشش کی اور جواؤ کینسیلو نے گیند جال میں پہنچائی، تاہم ویڈیو معاون ریفری کی جانچ کے بعد گول کو آف سائیڈ قرار دے دیا گیا، جس کے باعث پرتگال دوبارہ برتری حاصل نہ کرسکا۔
میچ کے آخری لمحات میں بھی پرتگال کو کئی مواقع ملے، لیکن کھلاڑی ان سے فائدہ نہ اٹھا سکے اور مقررہ وقت کے اختتام پر مقابلہ ایک، ایک گول کی برابری پر ختم ہوگیا۔اعداد و شمار کے مطابق میچ میں گیند پر 75 فیصد قبضہ رکھنے کے باوجود پرتگال کی کارکردگی مایوس کن رہی اور پوری ٹیم صرف تین مرتبہ ہی ہدف پر شاٹس لگا سکی۔
دوسری جانب پرتگال کے کپتان کرسٹیانو رونالڈو ایک مرتبہ پھر گول کرنے میں ناکام رہے۔ رونالڈو نے پورے نوے منٹ کے دوران صرف 25 مرتبہ گیند کو چھوا، جو کسی بڑے بین الاقوامی ٹورنامنٹ میں مکمل میچ کھیلنے کے باوجود ان کے کیریئر کی کم ترین ٹچز کی تعداد قرار دی جا رہی ہے۔
اعداد و شمار کے مطابق کرسٹیانو رونالڈو اب پرتگال کی نمائندگی کرتے ہوئے فیفا ورلڈ کپ اور یورپی چیمپئن شپ سمیت بڑے بین الاقوامی ٹورنامنٹس کے مسلسل دس میچوں میں گول اسکور کرنے میں ناکام رہے ہیں۔
