ڈلاس (رائٹرز/فیفا) فیفا ورلڈ کپ 2026ء کا پہلا سیمی فائنل منگل کو فرانس اور اسپین کے درمیان ڈلاس اسٹیڈیم میں کھیلا جائے گا۔ میچ پاکستانی وقت کے مطابق رات 12 بجے شروع ہوگا، جبکہ دوسرے سیمی فائنل میں دفاعی چیمپئن ارجنٹینا کا مقابلہ بدھ کی شب انگلینڈ سے ہوگا۔
48 ٹیموں پر مشتمل میگا ایونٹ میں اب صرف چار سابق عالمی چیمپئن ٹیمیں ٹائٹل کی دوڑ میں باقی رہ گئی ہیں۔ فرانس، اسپین، ارجنٹینا اور انگلینڈ میں سے دو ٹیمیں فائنل کے لیے کوالیفائی کریں گی۔
دو مرتبہ کی عالمی چیمپئن فرانس کی ٹیم کی قیادت کلیان ایمباپے کریں گے، جو رواں ورلڈ کپ میں آٹھ گول کر کے ٹیم کے نمایاں کھلاڑی ہیں۔ ان کے ساتھ عثمان ڈیمبیلے بھی شاندار فارم میں ہیں اور حریف دفاع کے لیے بڑا خطرہ سمجھے جا رہے ہیں۔
دوسری جانب 2010ء کی عالمی چیمپئن اسپین مضبوط دفاع اور متوازن کھیل کے ساتھ میدان میں اترے گی۔ اسپین کے اسکواڈ میں نوجوان اسٹار لامین یامال کے علاوہ مائیکل میرینو بھی شامل ہیں، جنہوں نے ناک آؤٹ مرحلے میں اہم مواقع پر فیصلہ کن کردار ادا کیا ہے۔
دوسرے سیمی فائنل میں تین مرتبہ کی عالمی چیمپئن اور دفاعی ٹائٹل ہولڈر ارجنٹینا کا مقابلہ 1966ء کی عالمی چیمپئن انگلینڈ سے ہوگا۔ اس میچ کا فاتح فائنل میں فرانس یا اسپین میں سے کسی ایک ٹیم کا سامنا کرے گا۔
