پاکستان میں خواتین کے کھیلوں کے لیے ایک تاریخی پیش رفت کے طور پر پاکستان ہاکی فیڈریشن نے “قومی ویمنز ہاکی چیمپئن شپ” کے انعقاد کا باضابطہ اعلان کیا ہے۔ یہ باوقار ایونٹ جولائی 2026 کے دوسرے ہفتے میں وفاقی دارالحکومت اسلام آباد میں کھیلا جائے گا۔چیمپئن شپ میں سندھ، پنجاب، خیبر پختونخوا (کے پی)، گلگت بلتستان ،اسلام آباد و دیگر ریجنز کی ٹیمیں مدمقابل ہوں گی، جو پاکستان بھر میں لڑکیوں کی ہاکی میں شرکت کو فروغ دینے اور اسے وسعت دینے کے لیے ایک اہم سنگِ میل ثابت ہوگا۔
پاکستان ہاکی فیڈریشن کے مطابق اس چیمپئن شپ کا بنیادی مقصد خواتین ینگ پلیئرز کی حوصلہ افزائی کرنا، انہیں پیشہ ورانہ تربیت اور بہترین ماحول (ایکسپوژر) فراہم کرنا ہے۔ اس کے ساتھ ساتھ ایک ایسا مسابقتی راستہ تیار کرنا ہے جس کے ذریعے یہ کھلاڑی مردوں کی طرح قومی اور بین الاقوامی سطح پر پاکستان کی نمائندگی کر سکیں۔ پی ایچ ایف حکام کا کہنا ہے کہ یہ اقدام ملک میں لڑکیوں کی ہاکی کے لیے ایک مضبوط اور پائیدار نظام کی بنیاد رکھے گا۔ فیڈریشن نے امید ظاہر کی کہ انشااللہ یہ اقدام پاکستان ہاکی کے لیے ایک روشن اور شاندار مستقبل کا آغاز ثابت ہوگا۔ پاکستان ہاکی فیڈریشن کے صدر محی الدین احمد وانی نے ٹورنامنٹ میں حصہ لینے والی تمام ٹیموں کے لیے نیک خواہشات کا اظہار بھی کیا ہے۔
