لیڈز (ویسٹ یارکشائر پولیس) برطانیہ کے شہر لیڈز میں پولیس نے کارروائی کرتے ہوئے 10 ہزار پاؤنڈ سے زائد مالیت کے مشتبہ جعلی نوٹ برآمد کر لیے اور دو مردوں سمیت تین افراد کو گرفتار کر لیا۔
ویسٹ یارکشائر پولیس کے مطابق آرملے کے علاقے میں ایک مکان پر چھاپہ مارا گیا، جہاں سے 20 پاؤنڈ مالیت کے جعلی نوٹ، جعلی دستاویزات، نوٹ چھاپنے کا سامان اور جعلی نوٹوں پر ہولوگرام لگانے کے لیے استعمال ہونے والے رولز برآمد کیے گئے۔
پولیس نے 28 اور 34 سالہ دو مردوں کو گرفتار کیا، جبکہ 34 سالہ ایک خاتون کو بھی حراست میں لیا گیا، جس پر منی لانڈرنگ میں ملوث ہونے کا شبہ ظاہر کیا گیا ہے۔
پولیس کے مطابق بعد ازاں تینوں افراد کو مزید تفتیش تک ضمانت پر رہا کر دیا گیا۔ حکام کا کہنا ہے کہ برآمد ہونے والے شواہد کی فرانزک جانچ جاری ہے اور اس بات کا بھی جائزہ لیا جا رہا ہے کہ آیا جعلی کرنسی کے اس نیٹ ورک میں مزید افراد بھی ملوث ہیں۔
ویسٹ یارکشائر پولیس نے عوام سے اپیل کی ہے کہ اگر کسی کو مشکوک کرنسی یا اس سے متعلق کوئی معلومات ہوں تو فوری طور پر پولیس کو آگاہ کریں۔
