بوسٹن(فیفا، اسپورٹس رپورٹس)فٹ بال ورلڈ کپ 2026 کے گروپ سی کے اہم میچ میں مراکش نے اسکاٹ لینڈ کو ایک صفر سے شکست دے کر تین قیمتی پوائنٹس حاصل کر لیے، جبکہ شکست کے باوجود اسکاٹ لینڈ کی اگلے مرحلے میں رسائی کی امیدیں برقرار ہیں۔
بوسٹن میں کھیلے گئے میچ میں مراکش نے انتہائی جارحانہ آغاز کیا اور کھیل کے صرف 71 ویں سیکنڈ میں سائبری نے گول کرکے اپنی ٹیم کو ایک صفر کی برتری دلا دی۔
ابتدائی گول کے بعد مراکش نے برتری میں اضافے کی کوشش جاری رکھی، جبکہ اسکاٹ لینڈ کی ٹیم خسارہ ختم کرنے کے لیے مسلسل حملے کرتی رہی، تاہم پہلے ہاف کے اختتام تک اسکور ایک صفر ہی رہا۔
دوسرے ہاف میں اسکاٹ لینڈ نے نسبتاً بہتر کھیل پیش کیا اور کئی مواقع پیدا کیے۔ ٹیم کی پاسنگ اور اٹیکنگ کھیل میں واضح بہتری دیکھی گئی، لیکن وہ گول اسکور کرنے میں کامیاب نہ ہو سکی۔
میچ کے اختتام پر مراکش نے ایک صفر کی برتری برقرار رکھتے ہوئے کامیابی اپنے نام کر لی اور گروپ سی میں اپنی پوزیشن مضبوط بنا لی۔
اس فتح کے ساتھ مراکش نے اہم تین پوائنٹس حاصل کر لیے، جبکہ اسکاٹ لینڈ کو شکست کے باوجود ایونٹ سے باہر نہیں ہونا پڑا اور اس کے لیے اگلے مرحلے میں رسائی کے امکانات بدستور موجود ہیں۔
