ہمبنٹوٹا (اے ایف پی، پی اے میڈیا، ایسوسی ایٹڈ پریس) دوسرے ون ڈے میں سری لنکا ویمن نے پاکستان ویمن کو 8 وکٹوں سے شکست دے کر تین میچوں کی سیریز ایک ایک سے برابر کردی، سری لنکا کی جانب سے وشمی گونارتنے اور ہرشیتا سماراوکرما نے سنچریاں اسکور کرکے ٹیم کو کامیابی سے ہمکنار کیا۔
ہمبنٹوٹا کے مہندا راجاپاکسا انٹرنیشنل کرکٹ اسٹیڈیم میں کھیلے گئے دوسرے ون ڈے میں پاکستان نے پہلے بیٹنگ کرتے ہوئے مقررہ 50 اوورز میں 5 وکٹوں کے نقصان پر 273 رنز بنائے۔
پاکستان کی جانب سے صدف شمس 12 اور گُل فیروزہ 27 رنز بناکر آؤٹ ہوئیں، جبکہ سدرا امین نے شاندار سنچری اسکور کی۔ انہوں نے 120 گیندوں پر 13 چوکوں کی مدد سے ناقابلِ شکست 100 رنز بنائے۔ عائشہ ظفر نے 49 اور منیبہ علی نے 45 رنز بنائے۔
274 رنز کے ہدف کے تعاقب میں سری لنکا کا آغاز اچھا نہ رہا اور کپتان چماری اتاپتو ایک رن بناکر آؤٹ ہوگئیں، تاہم وشمی گونارتنے اور ہرشیتا سماراوکرما نے دوسری وکٹ کی شاندار شراکت قائم کرکے میچ کا رخ اپنی ٹیم کے حق میں موڑ دیا۔
وشمی گونارتنے نے 123 رنز کی شاندار اننگز کھیلی جس میں ایک چھکا اور 11 چوکے شامل تھے، جبکہ ہرشیتا سماراوکرما نے ناقابلِ شکست 100 رنز بنائے۔ دونوں نے دوسری وکٹ کی شراکت میں 203 رنز جوڑے۔سری لنکا ویمن نے ہدف 46.5 اوورز میں 2 وکٹوں کے نقصان پر حاصل کرلیا اور 8 وکٹوں سے کامیابی اپنے نام کی۔
تین ون ڈے میچوں کی سیریز ایک ایک سے برابر ہوگئی ہے، سیریز کا تیسرا اور فیصلہ کن ون ڈے 28 جولائی کو اسی مقام، ہمبنٹوٹا میں کھیلا جائے گا۔ پاکستان کرکٹ بورڈ کے مطابق تینوں ون ڈے مہندا راجاپاکسا انٹرنیشنل کرکٹ اسٹیڈیم میں شیڈول ہیں۔
