اسلام آباد (نامہ نگار) صدر مملکت آصف علی زرداری نے 79ویں یوم آزادی کے موقع پر پاکستان اور بیرون ملک مقیم تمام پاکستانیوں کو دلی مبارکباد پیش کرتے ہوئے کہا ہے کہ 14 اگست ہمیں ان قربانیوں کی یاد دلاتا ہے جن کے نتیجے میں پاکستان معرض وجود میں آیا، آزادی صرف ایک تاریخی کامیابی نہیں بلکہ ہر نسل کی ذمہ داری بھی ہے۔
صدر مملکت نے کہا کہ ہم قائداعظم محمد علی جناح، تحریک پاکستان کے رہنماؤں اور کارکنوں کو خراج عقیدت پیش کرتے ہیں جنہوں نے وطن کے حصول کیلئے اپنے گھر، تحفظ اور روزگار قربان کئے۔ جمہوری خواہش کے نتیجے میں قائم ہونے والے پاکستان کو مزید مضبوط، محفوظ اور خوشحال بنانا ہماری ذمہ داری ہے۔
انہوں نے کہا کہ گزشتہ سال کے واقعات نے پاکستانی قوم کی قوت کا مظاہرہ کیا، معرکہ حق کے واقعات نے ثابت کیا کہ پاکستان امن چاہتا ہے تاہم اپنی خودمختاری اور قومی مفادات کے دفاع کیلئے عزم اور صلاحیت بھی رکھتا ہے۔ طاقت کا سبق دراصل ذمہ داری کا سبق ہے، جو ملک اپنا دفاع کرسکتا ہے اسے اپنی طاقت تنازعات روکنے، امن کے تحفظ اور عوام کے مفادات کیلئے استعمال کرنی چاہئے۔
آصف علی زرداری نے کہا کہ آج ہمیں جو سلامتی اور استحکام حاصل ہے وہ بڑی قربانیوں کا نتیجہ ہے۔ یوم آزادی پر مسلح افواج، قانون نافذ کرنے والے اداروں اور پولیس کے شہدا کو خراج عقیدت پیش کرتے ہیں اور ان کے اہل خانہ کی قربانیوں کو بھی سلام پیش کرتے ہیں۔ ان کی جرات اور عزم نے بیرونی جارحیت اور دہشت گردی کے خطرے سے ملک کے دفاع میں اہم کردار ادا کیا ہے۔
صدر مملکت نے کہا کہ خطے میں مذاکرات کی سہولت کاری کیلئے پاکستان کا کردار اس ذمہ داری کی اہم مثال ہے۔ پاکستان نے اپنے ذرائع ابلاغ، جغرافیائی محل وقوع اور سفارتی اثر و رسوخ کو بروئے کار لاتے ہوئے کشیدگی کم کرنے اور مذاکرات کی حوصلہ افزائی کی، ایسے وقت میں جب وسیع تر تنازع خطے اور دنیا کیلئے سنگین نتائج کا باعث بن سکتا تھا۔
انہوں نے کہا کہ پاکستان کا مؤقف واضح ہے کہ تنازعات خواہ کتنے ہی سنگین کیوں نہ ہوں، بالآخر انہیں مذاکرات اور سفارت کاری کے ذریعے حل کیا جانا چاہئے۔ ہماری سلامتی ہمارے ہمسایوں اور پوری دنیا کے امن و استحکام سے جڑی ہوئی ہے۔ پاکستان کشیدگی کم کرنے، علاقائی استحکام کے تحفظ اور تعاون کیلئے سازگار حالات پیدا کرنے کی کوششوں کی حمایت جاری رکھے گا۔
صدر مملکت نے کہا کہ ہمیں اپنے ملک کے اندر بھی توجہ دینے اور ان کاموں پر توجہ مرکوز کرنے کی ضرورت ہے جو پاکستان کے مستقبل کا تعین کریں گے۔ معیشت کو مضبوط بنانا، نوجوانوں کیلئے زیادہ مواقع پیدا کرنا، تعلیم اور ہنر کو بہتر بنانا اور حکمرانی، معاشی و سماجی اصلاحات کے ذریعے اداروں کو مضبوط کرنا ہوگا تاکہ ترقی اور جمہوریت کے ثمرات ملک کے ہر حصے اور ہر طبقے تک پہنچ سکیں۔
انہوں نے کہا کہ پاکستان کی سب سے بڑی طاقت اس کے نوجوان ہیں جو ملک اور دنیا بھر میں سائنس، ٹیکنالوجی، کاروبار، تعلیم اور تخلیقی شعبوں میں اپنی صلاحیتوں کا مظاہرہ کر رہے ہیں۔ ہماری ذمہ داری ہے کہ انہیں وہ تعلیم، ہنر اور مواقع فراہم کریں جن کے ذریعے وہ اپنی صلاحیتوں کو بروئے کار لاسکیں۔ نوجوانوں پر آج سرمایہ کاری پاکستان کے مستقبل پر سرمایہ کاری ہے۔
آصف علی زرداری نے کہا کہ عام پاکستانی کیلئے قومی ترقی کا مطلب عملی بہتری ہے۔ اس کا مطلب نوجوان کیلئے ایسا ہنر اور موقع ہے جس سے وہ اپنا مستقبل بنا سکے، خاندان کیلئے معیاری تعلیم اور صحت کی سہولیات تک رسائی ہے، جبکہ کسانوں، مزدوروں، تاجروں اور کاروباری افراد کیلئے مستقبل کی بہتر منصوبہ بندی کا اعتماد ہے۔ پاکستان کی ترقی کا اصل معیار یہ ہوگا کہ قومی ترقی سے عوام کی زندگیوں میں کتنی بہتری آتی ہے۔
صدر مملکت نے مقبوضہ جموں و کشمیر کے عوام سے یکجہتی کا اظہار کرتے ہوئے کہا کہ پاکستان کشمیریوں کے جائز حقوق اور ان کی جدوجہد کی حمایت جاری رکھے گا۔ جموں و کشمیر تنازع کا پرامن حل کشمیری عوام کی خواہشات اور اقوام متحدہ کی متعلقہ قراردادوں کے مطابق ہونا چاہئے۔
افغانستان کے حوالے سے صدر آصف علی زرداری نے کہا کہ تاریخی اختلافات کے باوجود پاکستان نے ہمیشہ اپنے ہمسایہ ملک افغانستان کی قومی خودمختاری کا احترام اور حمایت کی ہے اور اسی رویے کی توقع افغانستان سے بھی ہے۔ افسوس ہے کہ افغانستان کی موجودہ عبوری حکومت دہشت گرد گروہوں کو اپنی سرزمین پاکستان سمیت ہمسایہ ممالک کے خلاف حملوں کیلئے استعمال کرنے کی اجازت اور حمایت دے رہی ہے۔
انہوں نے الزام عائد کیا کہ طالبان حکومت پاکستان کے شہریوں اور سکیورٹی اہلکاروں پر دہشت گرد حملوں کیلئے بھارت کے ساتھ تعاون کر رہی ہے تاکہ پاکستان کی امن کی کوششوں سے توجہ ہٹائی جا سکے۔صدر مملکت نے خبردار کیا کہ پاکستان کے عوام کے خلاف ایسی کارروائیاں بند کی جائیں اور کہا کہ پاک فوج ان مذموم عزائم کو شکست دینے کی صلاحیت رکھتی ہے۔
آصف علی زرداری نے یوم آزادی کے موقع پر تمام پاکستانیوں سے اپیل کی کہ وہ جس بھی شعبے میں خدمات انجام دے رہے ہیں، ملک کی ترقی میں اپنا کردار ادا کریں۔انہوں نے دعا کی کہ اللہ تعالیٰ پاکستان کی حفاظت فرمائے، عوام کو امن و خوشحالی عطا کرے، ملک کو مضبوط بنائے اور بہتر مستقبل کی جانب رہنمائی فرمائے۔پاکستان زندہ باد۔
