کراچی(سپورٹس ڈیسک)پاکستان سپر لیگ (پی ایس ایل) 11 کے 15ویں میچ میں پشاور زلمی نے حیدرآباد کنگزمین کو دلچسپ مقابلے کے بعد 4 وکٹوں سے شکست دی۔نیشنل اسٹیڈیم کراچی میں کھیلے گئے میچ میں پشاور زلمی نے 146 رنز کا ہدف آخری گیند پر حاصل کیا، اور میچ کے بہترین کھلاڑی کا ایوارڈ افتخار احمد کے نام رہا۔
حیدرآباد کنگزمین کے خلاف اس میچ میں پشاور زلمی کے افتخار احمد نے 4 وکٹیں لیں، 2 کیچز پکڑے اور 15 رنز کی ناقابل شکست اننگز کھیلی۔پشاور زلمی کی طرف سے بابر اعظم 46، کوشل مینڈس 27 اور بریسول 25 رنز کے ساتھ نمایاں بیٹر رہے، جبکہ صائم ایوب نے 19 رنز کے عوض 2 وکٹیں اپنے نام کیں۔
حیدرآباد کنگزمین کی ٹیم 18.2 اوورز میں 145 رنز پر ڈھیر ہوگئی، جس میں کوشل پریرا 58 اور کپتان مارنس لبوشین 27 رنز کے ساتھ نمایاں بیٹر رہے۔پشاور زلمی کے سفیان مقیم اور افتخار احمد نے 4، 4 جبکہ عامر جمال نے 1 وکٹ اپنے نام کی۔
پشاور زلمی نے ٹاس جیت کر بولنگ کا فیصلہ کیا، اور ٹاس کے موقع پر پی ایس ایل کے سی ای او سلمان نصیر نے دونوں ٹیموں کے کپتانوں کے ہمراہ علامتی طور پر امن کی فاختہ اڑائی۔اس موقع پر ایران اور امریکا میں جنگ بندی میں پاکستانی حکومت کے کردار کو بھی خراج تحسین پیش کیا گیا۔
